Бөлүмдөр
Дүйшөмбү, 17-декабрь
Ош облусуАлай району 15.02.2016 09:01

Элдик уламыштар: Алайдын Ата Мекендик согуш учурунда буудайдын эң көп түшүмүн тапшырган Будалык айылы (фото)

Turmush -  Алайдын дыйканчылыкка ыңгайлуу шарты бар Будалык айыл өкмөтү буудайдын мол болгондугунан улам аталып калган. Аталган айыл өзүнө 200 жылдык тарыхты камтыйт. Бул тууралуу аталган айыл өкмөттүн жооптуу катчысы Жыпаргүл Осмонова аймактык кабарчыга билдирди.

«Биздин айылга адамдар 200 жыл мурун отурукташа баштаптыр. Бул тууралуу мен Жээнкүл Кыпыева атындагы орто мектебинин директору Жумабай Айткуловдон уктум. Бул аймак мурун жайлоо катары пайдаланылып келген. Алгачкы жолу Жошолу айыл өкмөтүнөн атантай уурусу көчүп келип, азыркы Кум-Шоро айылына отурукташып баштаган. Акырындык менен кыр-найза, жоруп уурулары келе баштаган.

Убакыттын өтүшү менен адамдар дыйканчылыктын сырын өздөштүрүп, буудай, арпа эге баштаган. Биздин айылда таш аз, жер семиз кара топурактуу болгондуктан дыйканчылыкка ыңгайлуу. Эгиндердин арасынан буудай жакшы түшүм берген. Ошондон улам буудай көп өскөн жер Буудайык деп жүрүп, Будалык аталып калган экен», - деди Ж.Осмонова.

Будалык айылында ылай көп болгондуктан Буудалык аталган деген аңыз кептер да айтылып келет.

Бүгүнкү күндө айыл өкмөт өзүнө 6 айылды камтыйт. 1930-жылдары Кайнама, Шалба айылдары биригип Октябрь колхозун, Кара-Суу, Кум-Шоро айылдары биригип Ворошилов колхозун түзүп, Улуу Ата Мекендик согуш учурунда буудайдын эң көп түшүмүн тапшырып турушкан. 1960-жылы 3 колхоз биригип, Ленин атындагы совхоздун 4-бөлүмү болуп уюшулган. 1995-жылы 20-мартта Будалык айыл өкмөтү болуп түзүлүп, Шабидин Айткулов жетектеген. 2012-жылдан тартып айыл өкмөттү Бактыбек Осмонов жетектеп келе жатат.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Комментарии
Для добавления комментария необходимо быть нашим подписчиком
Көп окулду
×