Бөлүмдөр
Бейшемби, 21-июнь
Ош

Элдик уламыш: Жоодон качкан пайгамбардын төөсү ташка айланып, белгисиз сыр каткан Төө-Моюн айылы (фото)

Turmush -  Араван районундагы Төө-Моюн айыл өкмөтү төөнүн чөгөлөп жатканындай элес калтырган тоонун атынан аталган. Ал тоонун чокусуна чөп чыкпайт. Учурда айыл өкмөттүн курамына 14 айыл кирет. Айылдын аталышына байланыштуу айтылып жүргөн уламышты айыл өкмөттүн кызматкери Бааркан Тагаева Turmush басылмасынын кабарчысына айтып берди.

«Элдик уламыштарда пайгамбар (кайсы пайгамбар жана кайсы убак экени белгисиз) төө менен жоодон качып, узак жол жүргөнү айтылат. Ээн талаага келгенде төөсү чарчап жатып калып, ордунан турбайт. Төөнү тургузуу аракети текке кеткен пайгамбар ачууланып: "Таштай болуп катып кал" деп, өзү жөө жөнөгөн. Көп узабай пайгамбардын бел байлаган куру, андан кийин селдеси түшүп калып, ташка айланган. Качып бара жаткан пайгамбар ошол убакта ал жерде жыш өскөн дарактарга бекинип, жоодон аман калган.

Ушул эле окуяны айрым жашоочулар башкача айтышат. Пайгамбар шашып качып бара жатканда куру менен башындагы селдеси түшүп калып, жоо алар аркылуу издеп келбесин деген ой менен Жараткандан кийимдерин ташка айлантууну суранат. Ошондон кийин Төө-Моюн тоосунда таштар пайда болгон деген кептер айтылып келет.

Төө-Моюн тоосунун өргөчүнүн ортосунда булак бар. Учурда жергиликтүүлөр ал булакка жана тоодогу таштарга зыярат кылып турушат», - деди Б.Тагаева.

Союз убагында айылга ар тараптан көчүп келгендер отурукташа баштаган. 1957-жылы окумуштуулар ал тоодон уран изилдешкен. Илимий маалыматтарга ылайык, уран бар тоонун башына чөп чыкпайт.

«Төө-Моюн тоосун жергиликтүүлөр Төө-Моюн-Ата деп аташат. Уранды текшерүү үчүн келген окумуштуулар башка улуттан болгондуктан ал жердин ыйыктыгын билишкен эмес. Текшерүүнүн башында турган адам ташты аттыруу үчүн буйрук берип, өзү алыстан гана көзөмөл кылып турган. Ал таш кулап, аткан адамдарды да, буйрук берген адамды да басып калган. Бул кырсыктан кийин жергиликтүүлөр Төөмоюн-Ата жазалады деп айтышкан. Бир учурда күнөөсү көп адамдар бул жерден кырсыкка кабылчу экен. Учурда айдоочулар да унаасын абайлап айдап, Куран окуп турушат», - деп кошумчалады Б.Тагаева.

Төө-Моюн айыл өкмөтүндөгү жашоочулардын негизги чарбачылыгы дыйканчылык. Аба ырайы аптаптуу болгондуктан жашылча-жемиштердин бардык түрлөрүн алгачкылардан болуп өстүрүшөт. Айыл Араван районунан 65 чакырым алыстыкта жайгашкандыктан майрамдарда айылдар арасында сынактар жарыяланып турат. Учурда Нооруз майрамына даярдык жүрүп жатат.

Сиздин реакция: Эркек Аял
Күлкүлүү
Капалуу
Таң калуу
Ачуулануу
Необходимо авторизоваться
Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Кароолор: 11831
Элдик уламыштар
Көп окулду
×