Бөлүмдөр
Ишемби, 15-декабрь
Ош облусуӨзгөн району 05.07.2016 12:14

Айыл турмушу: Эркин-Тоо айылы кыргыз тилиндеги алгачкы гезиттин урматына аталган

Turmush -  Өзгөн районунун Эркин-Тоо айылы Кыргызстандын туңгуч гезити «Эркин-Тоонун» урматына аталып калган. Бул тууралуу аталган айылдын тургуну Гулира Акылбек кызы айтып берди.

«Айылда булактар көп, сууга мол жер болгондуктан мурда Кош-Булак аталып, негизинен басыз уруусу жашап турган экен. Кийин колхоздоштуруу маалында жергиликтүүлөр кеңешип отуруп, айылдын атын өзгөртүүнү ойлошкон. Айыл тургундары 1924-жылы чыккан Кыргызстандын алгачкы "Эркин-Тоо" гезитин окугандан кийин жерибиз дагы, элибиз дагы эркин болсун деген тилекте айылдын атын Эркин-Тоо деп атап коюшкан», - деди Г.Акылбек кызы.

4

Ал белгилегендей, Кыргызстандын түштүгүндө биринчилерден болуп Эркин-Тоо айылында ГЭС курулган. Тоо арасындагы айылда күйгөн электр шамын коңшу аймактар суктанып карап турушкан.

Учурда Эркин-Тоо айылында 2 миңден ашуун калк жашайт. Жашоочулар мал чарбачылык, дыйканчылык менен алектенишет. Айыл ичинде бала бакча, ФАП, орто мектеп бар.

«Эркин-Тоо» гезити — кыргыз тилинде чыккан туңгуч гезит. Анын алгачкы саны 1924-жылдын 7-ноябрында Ташкент шаарында жарык көргөн. Кийинчерээк ал «Кызыл Кыргызстан», «Советтик Кыргызстан» аталып, учурда «Кыргыз туусу» деген аталышта жарык көрүп жатат.

1

1991-жылдын 3-июлунда «Эркин Тоо» аталышы менен дагы бир гезиттин алгачкы саны жарыяланган. Бул гезит Кыргызстандын мыйзамдарын жана башка расмий кагаздарын жарыялап келет.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Комментарии
Для добавления комментария необходимо быть нашим подписчиком
×