Бөлүмдөр
Бейшемби, 19-октябрь
68.61    80.6    1.2    KZT 0.21
Ош

Фото - Чоң-Алайдагы кар көчкү басып калган «Дэу Матиз» жана «Нива» унааларындагы 8 адамдын куткарылышы (толугу менен)

Turmush -  Транспорт жана жолдор министрлигинин №16 жол тейлөө ишканасынын жолчулары Чоң-Алайдагы кар көчкүнүн алдында калган 8 адамды куткарып калышты. Бул тууралуу министрликтин басма сөз кызматы билдирди. 

Маалыматка караганда, жолчулар бул окуяга унаа жолдогу кар көчкүнү тазалап жаткан учурда туш болушкан.

№16 жол тейлөө ишканасынын башкы инженери Канатбек Токтосуновдун айтымында, кечээ райондун аймагында бир нече жолу кар көчкү түштү.

«Дароот-Коргон—Чак—Жаш-Тилек унаа жолунун 0,3-чакырымындагы Балтырганды тилкесиндеги кар көчкүгө чейин 100 метр куб кар көчкүнү тазалаганбыз. Андан соң Сары-Таш—Карамык унаа жолунун 98-чакырымындагы кар көчкүнү тазалоого жөнөгөнбүз. Бизде бир жүк түрткөн унаа жана автогрейдер бар болчу.

Балтырганды тилкесинен өткөндөн кийин 300 метр арт жактан кар көчкүнүн алдында калган эки унааны көрдүм. Дароо №16 ишкананын жетекчисине, тез жардам кызматына жана Чоң-Алай РИИБге телефон чалдым. Бирок, тез жардам берүүчү номур өз учурунда телефондук чалуума жооп беришкен жок. Биз дароо эле кар көчкү түшкөн жерге барып, жолду ачып баштадык. Кар көчкү «Дэу Матиз» жана «Нива» унааларын басып калыптыр. «Дэу Матиз» унаасынын айдоочусун жана андагы жүргүнчү аялды, «Нивадан» 6 адамды алып чыктык. Кар көчкүнүн алдында калган 8 адамдын барын аман-эсен куткардык», - деди ал.  

Буга чейин ӨКМ маалымдагандай, 13-февралда саат 15:50 чамасында Дароот-Коргон—Чак—Жаш-Тилек унаа жолунун 0,3-чакырымындагы Балтырганды тилкесинде 3 миң метр куб кар көчкү түшкөн. Кар көчкү жолдон өтүп бара жаткан «Дэу Матиз» жана «Нива» унааларын басып калган. Эки унаада жалпы 8 адам бара жаткан.

Саат 17:30да аталган унаа жол бир тараптуу ачылган. Жолду тазалоо иштери кечке чейин улантылды.
Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Кароолор: 1866
Комментарии
Обсуждения закрыты
Көп окулду
×