При поддержке MegaCom

Бөлүмдөр
Шаршемби, 16-август
68.74    80.81    1.15    KZT 0.21

«Мекендештер»: Түштүк Кореяда окуган Н.Алтыбаев эс алуу учурунда Кыргызстанга туристтерди ала келет (фото)

Turmush -  Нурсултан Алтыбаев 1990-жылы Ош облусунун Кара-Кулжа районунун Алайкуу өрөөнүндөгү Терек айылында эл агартуучулардын үйүндө төрөлгөн. 1997-жылы айылдагы А.Абдымомунов атындагы орто мектепке кирип, аны 2007-жылы аяктаган. Андан кийин ОшМУдан билим алып, 2013-жылы мамлекеттик муниципалдык башкаруу факультетин аяктаган. Ушул эле жылы Түштүк Кореянын Ханьянг университетинин Корей тили институтунда билимин уланткан. Ал учурда ошол эле окуу жайдын магистратурасында эл аралык мамилелер боюнча билим алат. Аны менен аймактык кабарчы таанышты.

Нурсултан Алтыбаев ай сайын окуу жайдан 900 доллар стипендия алып турат. Ал бул окуу жайга Корея өкмөтүнүн программасы аркылуу барып, бекер окууга мүмкүнчүлүк алган.

Нурсултан үй-бүлөдө 5 бир тууган. Атасы Алтыбай Курманбаев 64 жашта, апасы Максат Сапаралиева 51 жашта. 

«Ата-энем өмүрүн мектепке арнашты. Учурда экөө тең пенсияда. Өз максаттарыбызга жетүүгө, туура жолго түшүүгө ата-энебиздин салымы чоң. Студенттик кезде эле активдүү бала элем. ОшМУда окуп жүргөндө окуудан сырткары жаштар комитетин жетектеп жүрдүм. Окуу жайдагы бардык иштерди, жаштардын, студенттердин дебаттарын, маданий иш-чараларын биз уюштуруп жүрдүк. Ошол кезде эле жаштар саясатына, мамлекетти башкаруу тармагына кызыкчумун. Сыртка чыгып окуп келүүнү да ниет кылчумун. Акыры тилегим, кыялдарым орундалып, учурда Түштүк Кореяда окуп, билимимди тереңдетип жатам», - деди Н.Алтыбаев.

Ал эс алуу учурунда жыл сайын Кореядан чет элдик эс алуучуларды Кыргызстанга өзү менен чогуу ала келет.

«Түштүк Кореянын мыйзамдары боюнча корей тилин кайсы бир деңгээде билүү керек. Негизи окуу жайлары өздөрүнүн этаптары менен кабыл алышат. Башында 1-1,5 жылга чейин корей тилдерин үйрөндүк. Сабактан тышкары иштеп, өз акчам менен тил курсунда окудум. Алтынчы этабына чейин окуп, корей маданиятын, тарыхын, тилин, динин кеңири үйрөндүм. Бул жерден карама-каршылыкты айта турган болсок, Кыргызстанга сырттан келген чет элдик студенттер кыргызча же расмий тилди үйрөнбөй окууларын бүтүп жатышат. Биздин кемчилигибиз мына ушул экен. Кореяда корей тилин өз деңгээлинде үйрөнмөйүнчө, алар ар нерселерди талап кылышат. Кыргызстанда да ушундай болсо жакшы болмок деп койдум. Жыл сайын Кореядан эс алуучуларды, кыргыз жерин көрүүгө кызыккан чет элдиктерди ала келебиз. Андан сырткары котормочулук кызматтарын да аркалап жатабыз», - деди ал.

Кореянын өкмөтү каржылаган программа аркылуу Кореянын 60дан ашык окуу жайларына дүйнөнүн 120 мамлекеттеринен барып окуган студенттер бар.

«Бирок, Корея өлкөсү Кыргызстанга берген квотанын саны аз. Жылына 10-11 эле студентке орун берет. Ал жерде окуйм дегендердин саны 60-70ти түзөт. Кореяда кыргыз мекендештерибиздин "Биримдик" деген коомдук уюму бар. Анда элчилик менен бирге кызматташып жүрдүк. Андан соң студенттердин башын бириктирген коомдук уюм түзгөнбүз. Анда, 2017-жылдан бери төрага болуп иштеп келем. Окуудан сырткары убакыт болгондо элчилик менен тыгыз иштешип турабыз. Мындан тышкары, Кыргызстандын атын тааныта турган, атын чыгара турган иш-чараларга катышып активдүүлүгүбүздү көрсөтүү менен алекпиз. Негизи Кореяда 300гө жакын кыргызстандык студенттер ар тармакта окушат», - деди Н.Алтыбаев.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Кароолор: 574
Комментарии
Обсуждения закрыты
Көп окулду
Учурда окулуп жатат
×
Урматтуу окурман, мекенибиздин аймактагы «турмушунан» кабар алганыңыз үчүн ыраазычылык билдиребиз.
Куш кабарыбыз маалыматтык чаңкооңузду канааттандырса «Нравится» эн белгисин басуу менен сиз үчүн кылган ишибизге дем бериңиз!
Жабуу