Бөлүмдөр
Ишемби, 15-декабрь
Ош облусуЧоң-Алай району 08.08.2018 20:10

Айыл турмушу: Чоң-Алайда карагатты токочтой кылып кургатып, узакка сакташат

Turmush -  Чоң-Алай районундагы Карамык айылынын тургуну Чолпонбай Назарали уулунун короосунан карагаттын 5 түрүн көрүүгө болот. Ысык-Көл облусунан алынып келген карагат шарты катаал, тоолуу аймакка да ыңгайлашып, учурда жакшы түшүм берип жатат. Бул тууралуу дыйкан өзү аймактык кабарчыга айтып берди.

«Биздин айылга Буркан Шамшиев деген жердешибиз карагаттын 4 түрүн Ысык-Көл облусунан алып келген. Мен дагы кызыгып, көчөттөрүн алып өстүрө баштагам. Учурда 3 сотых жерге карагаттын 5 түрүн өстүрөм. Менин короомдо тоо карагат, дарбыз, кызыл жана кара карагат, ошондой эле жергиликтүү түрү бар.

Тоо карагат — жергиликтүү карагатка окшош, майдараак, кара түстө болот. Ал эми дарбыз карагаттын өзгөчөлүгү түсү көгүш болуп, дарбыздын өңүн берип турганында. Бойлору жапыз болот. Ал эми кызыл карагат аты айтып тургандай кызыл түстө болсо, кара карагаттын мөмөсү бармактай чоң болуп бадырайып турат. Кара карагаттын бийиктиги 3 метрге чейин жетип, даамы да өзгөчө болот», - деди ал.

Чоң-Алайдын эли карагаттарды токоч сымал катырып, узак убакытка чейин сакташат.

«Биз тоодон терип келген карагатты сууга кайнатып, коюу болуп калганда токочтой кылып катырып, кургатып алабыз. Кургатылган карагаттар канча убакыт сакталса дагы сапаты бузулбайт. Кийин кайра сууга кайнатсак кыям болуп чыга келет», - деди Чолпонбай Назарали уулу.

Карагатты тоонун шартына көндүрүп, андан түшүм алуу көп эмгекти талап кылат.

«Карагат сууну сүйгөн өсүмдүк. Сууну канчалык көп берсең, түшүмү ошончо жакшы болот. Биздин райондо суук эрте түшүп, кар да калың жаайт. Кышка карата карагаттардын түбүнө малдын кыгы менен жыгачтын таарындысын төгөбүз. Анткени алар кышы менен карагаттарды сууктан коргойт. Мындан сырткары айланасын отоо чөптөрдөн тазалап туруу керек. Карагаттар мөмө алганда өзүнүн салмагын көтөрө албай калат. Шагы жерге тийип калбасын деп байлап турабыз. Ал эми түшүм август айында бышат», - деди Чолпонбай мырза.

Анын айтымында, учурда Карамыктагы элдин болжол менен 20 пайызы карагат өстүрүп, түшүмүн сатыкка чыгарышат. Учурда карагаттын 1 кг 80 сомдон тарта 100 сомго чейин бааланып жатат.

48 жаштагы Чолпонбай Назарали уулу кесиби боюнча тарыхчы, 6 баланын атасы.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Комментарии
Для добавления комментария необходимо быть нашим подписчиком
×