Бөлүмдөр
Шейшемби, 16-октябрь
Ош облусуАлай району 27.09.2018 02:05 На русском

Айыл турмушу: Алайлык студенттер котормочулук менен айына 30 миң сомго чейин киреше табышты (сүрөт)

Turmush -  Учурда Ош шаарындагы жогорку окуу жайда 2-курста билим алып жаткан Жаныбек Жалиев, Байыш Тообаев, Тимур Алмамбет уулу жана Кубат Бекташ уулу 1 жылдан бери жергиликтүү туристтик компаниялардын биринде туристтерге кызмат көрсөтүп келишет. Алар Алай районунун Таш-Короо жана Жылуу-Суу айылдарында чоңоюшкан.

Келечекте чет өлкөдөн билим алууну кыялданган жаштардын бири Жаныбек Жалиев чет тилдер факультетинде окугандыктан туристтер менен маектешүү чет тилдерди бат өздөштүрүүгө өбөлгө болот деген пикирин айтат.

«Учурда Ош мамлекеттик университетинин чет тилдер факультетинде 2-курста окуйм. Туристтер менен иштешип калганыбызга айылдаш агабыз себепчи болду. Мен жергиликтүү туристтик компанияда иштеп калганыма аябай кубанып жатам. Аны менен билим алуудан сырткары туристтер менен иштешип, сүйлөшүп, алардан өзүмө тажрыйба топтоп жатам. Мындан сырткары ата-энемден акча сурабай, өзүмдү-өзүм бир аз да болсо каржылаганым кубандырат», - деди Жаныбек.

Сөзгө аралашкан жаш гид Ж.Жалиев: «Генералдыкты эңсебеген жоокер болбойт дегендей, мен да кичинемде биздин жайлоолорго келген туристтерди көрүп, ушулардын тилин билип, аларга Кыргызстандын керемет жерлерин көрсөтүп келсем деп кыялданчу элем. Эми минтип кыялдарыма акырындык менен жакындап баратканыма кубанып отурам», - деп кошумчалады.

Тимур Алмамбет уулу да Ош шаарындагы окуу жайда билим алып жатат. Ал быйылкы жайкы эс алуусун туристтер менен биргеликте өткөргөн. Алыскы тоолордун арасында алгачкы жолу туристтерге тилмеч болгонун билдирди.

«Мен туристтер менен иштешип калам деп ойлогон эмесмин. Азирет аттуу агабыз туристтик компанияда иштөөгө боло турганын айтып калды. Алгач иштеп баштаганда кооптонуу болду. Анткени туристтердин коопсуздугуна биз жоопкер элек. Акырындык менен көнүп калдык. Ар бир ишти баштоодо кыйынчылык болбой койбойт», - деди Тимур.

Жаш тилмечтер чет өлкөдөн келген туристтерди Алайдын Сары-Ой, Беш-Көл, Ак-Төр, Чыйырчык, Тулпар-Көл сыяктуу кооз жайлоолору менен тааныштырышат.

«Туристтерди тейлөө мага жакты. Анткени биз түрдүү курактагы туристтер менен иштешебиз. Бул жоопкерчилик бир жагынан кыйынчылык жаратса, экинчи жагынан өзүңдү-өзүң тарбиялап, тажрыйба аласың», - деп кошумчалады Тимур.

Гид катары эмгек жолун баштаган 4 студент чет өлкөдөн келген туристтердин убакытка так экенин көрүп таң калышкан.

«Мен америкалык студенттердин бири-бирине жасаган мамилесин, сүйлөшкөнүн көрүп, таасирлендим. Чет өлкөлүктөр көздөгөн максатына жетүүгө аракет кылып, бир мүнөтүн дагы текке кетирбейт экен. Бир ирет сырттан келген туристтер орус тилин жакшы өздөштүрбөсө дагы ал тилде сүйлөп жатышкан. Себебин сураганда алар Кыргызстанга келүүдөгү башкы максаты орус тилин үйрөнүү болгонун айтышты. Мындай кызыктуу учурлар көп кездешип турат», - дейт Жаныбек.

Туристтердин көпчүлүгү кыргыздардын меймандос, кең пейил экенине баа беришет. Ар бир келген турист тоолорго чыкканда деңиз деңгээлинен канча метр бийиктикте бара жатканын жана канча убакытта белгиленген жерге жетерин тынымсыз сурап турушат. Ошондой эле кыргыз элинин тарыхына, маданиятына кызыгып, суроо узатышат.

Котормочу жигиттер бул кызматы менен айына болжолдуу 15 миңден 30 миң сомго чейин эмгек акы алышат.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Комментарии
Для добавления комментария необходимо быть нашим подписчиком
×