Бөлүмдөр
Шаршемби, 26-июнь
Ош облусу, Ош 22.10.2018 16:46

ОшМУнун студенттери үчүн: Чет өлкөдөн кантип окуп келсе болот?

Turmush -  Ош мамлекеттик университетинде 19-октябрда чет өлкөлөрдөгү жогорку окуу жайлардан билим алууга жол көрсөтүүгө багытталган «Чет өлкөдөн кантип окуп келсе болот?» деген темада маалымат жыйын уюштурулду. Бул иш-чара академиялык мобилдүүлүк жөнүндө жалпы маалымат берүү, чет өлкөгө чыгып келген студенттерге тажрыйбаларын башкалар менен бөлүшүүгө шарт түзүү, студенттерге чет өлкөдөн тажрыйба алмашып, окуп келүүгө мотивация берип, кызыгуусун арттыруу максатын көздөйт.

Erasmus+, Mevlana, УШОС, ички мобилдүүлүк жана башка чет өлкөлүк билим берүү программалары тууралуу маалыматтарды жайылтуу максатындагы жыйын ОшМУнун эл аралык байланыштар бөлүмүнүн адистери тарабынан уюштурулган, деп билдирди окуу жайдын басма сөз кызматы.

Аталган жыйынга университеттин, андагы колледждердин чет өлкөдөн окуп келүүнү самаган студенттери, магистранттар катышты. Алгач аталган жыйында ректор Каныбек Исаков университеттеги эл аралык байланыштар багытындагы мүмкүнчүлүктөр, аракеттер, жасалып жаткан иштер боюнча кеңири маалымат берди. Ошондой эле Италия, Эстония, Испания, Германия, Кытай, Индия, Россия, Түркия, Казакстан, Өзбекстан, Түркмөнстан, Тажикстан, Корея, Япония жана башка өлкөлөрдөгү алдыңкы университеттер менен болгон байланыштар, академиялык алмашуу программалары, эки тараптуу кызматташууларга кеңири токтолду.

Жыйындын жүрүшүндө панелдик дискуссия жүрүп, анда Испания, Германия, Чехия, Түркия, Кытай, Япония, Түштүк Корея сыяктуу мамлекеттердин алдыңкы окуу жайларынан академиялык мобилдүүлүктөн өтүп келген студенттер презентацияларды жасашып, чет өлкөдө билим алуунун шарттары, мүмкүнчүлүктөр, жетишкендиктер боюнча маалымат беришти.

Кеченин коногу — «Азаттык» басылмасынын Чехиядагы бюросунда бир нече жылдан бери үзүрлүү иштеп келе жаткан белгилүү журналист, публицист Амирбек Аззам уулу студенттерге ишмерүүлүгү боюнча айтып, мотивация берүүчү кеңештерин берди. Ошондой эле ОшМуда учурда заманбап билим алуу үчүн бардык шарттар түзүлгөнүн, студенттерде билим алууга, өсүүгө бир гана каалоо керектигин белгиледи.

Жыйындын соңунда студенттер чет өлкөдөн билим, тажрыйба алып келген студенттерге кызыктырган суроолорду беришип, жоопторду алышты.

Учурда ОшМУдан жылына 1,5 миңден ашуун студенттер, 300дөн ашуун окутуучулар чет өлкөлөрдөгү университеттерде 1 айдан 1 жылга чейинки аралыкта билим, тажрыйба алып келүүдө. Окутуучулардын, студенттердин чет өлкөлөрдөн билим алуусуна шарт түзүү максатында университетте көп тилдүүлүк боюнча алгылыктуу иштер жүргүзүлүп, каалоочулар үчүн англис, немис, түрк, кытай, орус тилдерин үйрөтүүчү курстар уюштурулуп келет.

Жыйында эл аралык байланыштар бөлүмүнүн алдында жаңыдан түптөлүп келе жаткан StudDIPLOMACY студенттик бирикмеси да расмий түрдө тааныштырылды.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×