Бөлүмдөр
Шаршемби, 26-июнь
Ош облусу, Ош 13.02.2019 12:26 На русском

Оштогу «Сулайман-Тоо» музей комплекси дагы 41 экспонат менен толукталды (сүрөт)

Turmush -  Ош шаарындагы «Сулайман-Тоо» улуттук тарыхый-археологиялык музей комплексине VIII-IX кылымдарга таандык делген 41 экспонат өткөрүлүп берилди. Бул тууралуу музей комплекстин эстеликтерди коргоо бөлүмүнүн башчысы Шайыр Абжапарова билдирди.

Анын айтымында, экспонаттар Өзгөн шаарынын аймагынан табылган.

«Музей комплекстин казына бөлүмү дагы 41 археологиялык баалуулук менен толукталды. Өзгөн шаарынын түштүк тарабындагы Кара дарыянын оң жээгиндеги дөңсөөдөн табылган экспонаттарды кечээ, 12-февралда музейдин директору Султан Абдыракманов өзү барып алып келди. Бул табылгалар болжол менен VIII-IX кылымдарга таандык болушу ыктымал. Эми адистер изилдөө иштерин жүргүзөт», - деди ал.

1 ай мурун аталган музей Өзгөн шаарынын 1-шахристан шаар чалдыбарынан табылган 39 экспонат менен толукталган болчу.

«Сулайман Тоо» улуттук тарыхый-археологиялык музей комплекси Кыргызстандагы эң ири музейлердин бири. Музей 1949-жылы 15-майда түптөлүп, учурда 33 миңге жакын экспонат бар.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×