Бөлүмдөр
Бейшемби, 20-июнь
Ош облусуЧоң-Алай району 23.02.2019 20:23 Жаңыланды: 24.02.2019 11:12

Айыл турмушу: 5 тилде сүйлөгөн Рахима Жакыпова кол эмгектерин чет өлкөлөргө да жөнөтөт (сүрөт)

Рахима Жакыпова, Чоң-Алай районунун тургуну
Рахима Жакыпова, Чоң-Алай районунун тургуну
// Turmush

Turmush -  Ош облусунун Чоң-Алай районунун 18 жаштагы тургуну Рахима Жакыпова кыргыз, орус, англис, немис жана түрк тилинде эркин сүйлөйт. Ал кол өнөрчүлүктөн тапкан акчаны керектөөлөрүнө жумшап, кайрымдуулукка да арттырат.

Рахима учурда Бишкек шаарындагы жогорку окуу жайлардын биринде 2-курста окуп жатат. Ал окуучу кезинен эле билерик, сөйкө, теспе, чынжырча жасап сатат.

«Ал эми гүл жасоону 12 жашымда апамдан үйрөнгөм. Гүлдөрдү фантазияма жараша кагаз, кездеме, кийиз, бисерден жасайм. Баары оңойдой көрүп кызыгып, бул өнөрдү үйрөтүүнү суранышат. Бирок жөндөмдүүлөр гана үйрөнүп кетет. Гүл менен чектелбей, ар кандай майрамдарга, кечелерге белектердин түрүн жасайм. Ошондой эле байпак, сумка, килем токуганды жакшы көрөм. Кол өнөрчүлүктүн майда түрү менен алектенип акча тапса болот. Эмгектеримди сатыкка чыгарып баштаганыма 3 жыл болуп калды. Алгачкы кардарларым туугандарым, досторум болгон. Тапкан акчамды билим алуума жумшайм», - дейт Рахима Жапарова.

Рахиманын айтымында, бир кутудагы гүлдү жасоо үчүн 1 сааттан ашык убакыт кетет. Ал буйрутманы кардардын табитине жараша жасап берет.

«Кол өнөрчүлүк хоббим болгондуктан түшкөн кирешени эсептебейм. Тапкан акчамдын 40 пайызын кайрымдуулукка жумшап, коомдук бирикме, уюмдарга демөөрчүлүк кылам. Кардарларым менен убакытка так мамиле жасайм. Сабактагы тапшырмаларды аткаруу керек болсо да буйрутманы бүтүрүп коюп, түнкүсүн окуйм. Билерик, теспелерди Түркия, Өзбекстанга, гүлдөрдү Талас, Ысык-Көл, Баткенге жөнөтөм. Канадалык досум апасынын туулган күнүнө гүл жасатып кеткен эле. Бир байке 8-мартка эки күн калганда 5 гүлгө буйрутма берген. Майрамга карата буйрутмаларым көп болуп, түнү менен жасап чыккам», - деди Рахима Жапарова.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×