Бөлүмдөр
Шейшемби, 16-июль
Ош облусуКара-Суу району 10.03.2019 09:20

Видео, сүрөт — 40 000 долларлык аргымактарды баккан К.Сатыбалдиевдин 5 айлык козулары 25 000 сомдон бааланат

Turmush -  Оштун 43 жаштагы жашоочусу Курсантбек Сатыбалдиев бүгүнкү күнгө чейин байыркы кыргыз тукумундагы аргымактар менен жаңы кыргыз тукумундагы аргымактарды багат. Аймактык кабарчы анын чарбасы менен таанышып кайтты.

Бир нече жыл мурун Кара-Суудан 35 миң долларга карабайыр тукумундагы жылкы сатып алганын айткан Сатыбалдиев аргымактардын асылдарын багуу ата-бабадан калган салт экенин билдирип, жылкылардын өзгөчөлүгүнө токтолду.

«Азыр асыл тукум 8 аргымак багам. Мен үчүн булардын ар биринин орду өтө чоң. Убагында атам да мага "жылкыга орой мамиле кылба" деп айтчу. Улуулардын кеби боюнча жылкы адамдын ооматы экен. Жылкы адамга көп жакшы тилектерди тилеп, өзүнө "4 туягым аман болсо, өмүрүм өткүчө кожоюнума кызмат кылып өтөйүн" деп бир гана тилек тилейт экен. Андыктан жылкынын бул касиетин баркташ үчүн да аргымак багуудамын», - деди ал.

Сатыбалдиев: «Мен бир нече жыл мурун Кара-Суудан Чагылган аттуу аргымак сатып алгам. Ал байыркы кыргыз тукумундагы аргымак экен. Азыр бул аргымакты мен баалабасам да ылдамдыгын эл баалап жатат. Анткени бул аргымак аламан, көк бөрүдө октой учат. Анын ушул ылдамдыгын баалап, мурунку ээси Чагылган деген атты ыйгарып койгон экен. Мен анын бул аты өзүнүн затына жарашат деп ойлойм. Учурда бул аргымак 8 жашта, бою 168 см. Жер-жерлерде өткөн улак тартыш оюндарына калбай барат. Бул аргымагымды көбүнчө Ниязовдордун кичүүсү Манас чабат. Ал жакында эле Ноокатта болгон улакта "Жигули" унаасын утуп алды», - деди.

Курсантбек Сатыбалдиевдин Чагылган аргымагы 40 миң доллардан ашуун баада турат. Бирок ал аргымактарын сатууну каалабайт.

Ал башка тукумдагы аргымактарын да тааныштырды.

«Азыр аргымактарымдын ичинен Орлов тукумундагы жылкым бар. Анын атасы Аккула деген аргымагым эле. Азыр аргымактарымдын ичинен эң жашы ушул. Орлов тукумундагы Көкчө деген күлүгүм бар. Бул 5 жашта. Аны Россиядан Жалал-Абадга алып келишкен. Ал жактан мен сатып алдым. Учурда бул күлүктү карабайыр тукумундагы бээлер менен аргындаштырайын деп жатабыз.

Мындан сырткары чыныгы кыргыз тукумундагы аргымагымды 5 күн мурун Жалал-Абаддан алып келдим. Бою 165 см. Чыныгы кыргыз аргымактары ушундай болгон. Бою 165 см ашкан эмес. Алдыңкы туяктарынын булчуңу жоон болуп, башы менен мойну бирдей көлөмдө болот. Дагы бир жаңы эле алынып келген жылкым бар. Ал карабайыр тукумундагы аргымак менен англис тукумундагы жылкыдан аргындашкан», - деди ал.

Сатыбалдиев «Аккула» чарбасын негиздеп, нукура кыргыз жылкысын өндүрүүнү пландоодо.

«Аталган чарбаны негиздеп, нукура кыргыз тукумундагы аргымактарды өстүрүү биздин тилек болуп турат. Учурда асыл тукум бээлерди сатып алганы жатабыз», - деди ал.

Анын чарбасында асыл тукум койлор да багылат. Койлордон асыл тукум козуларды алуу үчүн Ооганстандан 270 миң сомго өзгөчө тукумдагы кочкор сатып келген. Учурда кочкордун бою 112 см, тирүүлөй салмагы 160 кг. Бул өзгөчө тукумдагы койлордун 5 айлык козулары 20-25 миң сомдон сатылат. Сатыбалдиев койлордун асылдуулугун мындан ары да өркүндөтүүнү көздөп жатат.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×