Бөлүмдөр
Ишемби, 20-июль
Ош облусуНоокат району 26.03.2019 14:28 На русском

«Жолдошум кууланба дечү»: Миасар ооруга чалдыкканда күйөөсү баласы менен кошо таштап кеткен (сүрөт)

Turmush -  Ош облусуна караштуу Ноокат районунун 25 жаштагы тургуну Миасар Усманова 2 жылдан бери боордун циррозу менен жабыркап келет. Андан тышкары аз кандуулук менен дагы ооруйт. Миасар айымдан аймактык кабарчы кабар алды.

Өзүнүн айтымында, ал оорусу күчөп кеткен кезде кан кусуп, оорукананын жандандыруу бөлүмүнө күн алыс түшүп калат.

«Мен бул илдет менен 2017-жылдан бери жабыркап келем. Буга чейин ооруп жүргөм, бирок боорум ооруганын билген эмесмин. Ар кандай дары-дармектерди ичип жүрө бердим. Балким башында эле билгенимде азыр мындай абалга түшпөйт белем? Боорумду толугу менен алмаштырыш керек болуп жатат. Операцияга 40 миң доллар керек экен. Андай акча бизде каякта?... Эл-журт жардам берсе, балким жакшы болуп кетем деген үмүтүм бар.

Цирроз деп диагноз коюлгандан кийин жолдошум таштап кетти. Ортобузда 1 уулубуз бар. Ооруп жүргөндө кандай кыйынчылык болсо дагы ата-энеме айта албадым. Аларды кыжаалат кылгым келген жок. Облустук ооруканага барып текшерилгенде Гүлнара Төрөевна деген дарыгер бөйрөгүңө суук тийиптир деп асма ийнелерди (капельница) жазып берди. Аларды алгандан кийин ичим шишип, ооруганына чыдай албай калдым. Жолдошум менен кайын энеме айтсам боюңда болуп калган дешип, ооруп жатканымды айткан сайын "кууланба" деп жаман көрүп, тилдешчү. Чыдай албай калган кезде ата-энемдин үйүнө алып баргыла дедим. Ошондон кийин алар мени ооруканага алып барышты. Кан басымым 33 болуп төмөндөп кетиптир. УЗИге түшкөндө боорго суу толуптур дешип, цирроз деген диагноз коюшту», - деди Миасар Усаманова.

Ал Ош облустар аралык бириккен клиникалык ооруканасында бир курс дарылануудан өткөн.

«Ал жактагы дарыгер апамдан дароо эле "кызыңызды даарылатканга акчаңыз барбы?" деп сурады. Апам байкуш канча акча болсо да таап берем деди. Ошондон кийин гана ооруканага жатып, дарыландым. Дарыгер айткандай, бир эле ийнеси (укол) 3-4 миң сом экен. Апам "күйөөңдүн үйүнө барба" дегенине карабай кетип калдым. Бир айга жетпей ооруп, апамдын жанына кайра келдим. Ден соолугуң болбосо апаңдан башка эч кимге керегиң жок экен. Кыйналып жатканда жолдошум тетири карап басып кетти. Ооруганда жакшы сөз жаныңа дары болот экен. Жакын адамымдын ушундай учурда менден баш тартканы ого бетер оорумду күчөттү. Жаштык кылып, оорусам дагы жолдошум деп кызматын кылып жүрүптүрмүн. Бирок мен ага капа эмесмин. Кудай баарын көрүп турат. Мен апамды эле аяп жатам. Байкуштарым мени көрүп, кыйналып кетишти. Азыр 2-топтогу майып болуп пенсияга чыккам», - деди Миасар.

Учурда уулу өзүнүн колунда.

Миасар Усмановага жардам берүүнү каалагандар 0551677718 (Элсом), 0700549901 (Вотсап) номурлары аркылуу байланышса болот.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×