Бөлүмдөр
Бейшемби, 20-июнь
Ош облусу, Ош 17.04.2019 13:02 На русском

Видео — Ошто Дүйнөлүк кубоктон байгелүү кайткан Т.Багынбай уулун жана Б.Тиленбаевди салтанаттуу тосуп алышты

Спортчуларды тосуп алуу учуру
Спортчуларды тосуп алуу учуру
// Turmush

Turmush -  Бүгүн, 17-апрель күнү «Ош» эл аралык аэропортунда Тайландда студенттер арасында жиу-житсу боюнча өткөн дүйнөлүк кубокто алтын медаль тагынган Төрөкан Багынбай уулун жана аталган мелдеште коло медаль тагынган Бекболот Тиленбаевди салтанаттуу түрдө тосуп алышты. Бул тууралуу аймактык кабарчы билдирди.

Салтанаттуу тосуп алуу иш-чарасына Ош шаардык дене тарбия жана спорт комитетинин төрагасы Кылычбек Саркарбаев жана спортчулардын ата-энеси, жакындары, ошондой эле спорт сүйүүчүлөрү барышкан.

«Өлкөбүздүн, сүйүктүү шаарыбыздын намысын чет өлкөдө коргоо мен үчүн сыймык. Бизди ушундай мелдештерге жиберип, колдогон ата-энелерибизге, машыктыруучуларыбызга жана көмөктөшкөндөргө чоң ыракмат!», - деди Төрөкан Багынбай уулу.

11-апрель күнү Тайланд мамлекетинин Чиангмай шаарында студенттер арасында жиу-житсу боюнча өткөн Дүйнөлүк кубокто Төрөкан Багымбай уулу алтын медаль тагынганын «Баракелде» басылмасы жазган.

Төрөкан Багымбай уулу Дүйнөлүк кубокто 77 кг салмактагылар арасында 4 беттеш өткөрүп, 4 атаандашын тең жеңген. Финалдык беттешин Кувейт өлкөсүнүн балбаны менен өткөргөн. Ага чейин арабиялык жана тайланддык 2 балбанды уткан.

Ош шаарынын спорт жана дене тарбия комитетинин төрагасы Кылычбек Саркарбаевдин айтымында, 2022-жылы жиу-житсу олимпиадалык оюндардын катарына кошулат.

Төрөкан Багынбай уулун тосуп алууга апасы Чолпон Жүзбаева дагы келген.

«Балам спорт чөйрөсүндө өз ордун тапканына кубанычтамын. Төрөкан чет өлкөгө мелдешке кеткенде кайра үйгө, кучагыма келгенге чейин тынчсызданам. Уулум кыргыз элинин намысын коргогону мен үчүн чоң сыймык, бакыт!», - деди Чолпон Жүзбаева.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×