Бөлүмдөр
Жекшемби, 19-май
Ош облусу, Ош 24.04.2019 17:41

Видео: Ошто алгачкы жолу чүкө оюндары боюнча республикалык мелдеш өтүүдө

Turmush -  Бүгүн, 24-апрелде Ош шаарында чүкө оюндары боюнча республикалык ачык чемпионат башталды. Бул тууралуу «Айкүр» федерациясынын вице-президенти Искендер Кожокеев билдирди.

Биринчиликке Кыргызстандын жети облусунан 12 команда катышууда.

«Ош шаарында биринчи жолу чүкө оюндары боюнча ачык чемпионат өтүүдө. Эски оюнду кайра жандандырып, өлкө ичинде биринчи жолу чемпионат өтүп жаткангабы, айтор оюнчулар бир аз кыйналып жатышат. Чүкө оюндарынын 5 түрү боюнча мелдештер болууда. Алар — үч тапан кыйыр, акыл, кан таламай, топ чүкө, көчмөн оюндары. Илгери ата-энелер уул-кыздарын ушундай оюндар менен тарбиялап, өстүргөн. Биз эми ушундай кызыктуу оюндарды кайра жандандырып баштадык», - деди И.Кожокеев.

Биринчиликтин катышуучусу Галина Арзыкулова Талас облусунан келген. Ал үй-бүлөсүндө чүкө оюндарын адатка айландырып, бош убактысында балдары менен ойноп турат.

«Чүкө оюндарынын кан таламай түрүнө катышып жатам. Жаш кезимден бери кыздар менен топ таш, чүкө ойноп чоңойгондуктан бул оюнга жакынмын. Учурда үйдө да балдарым менен ойногонду адат кылып алганбыз. Анткени бул оюн менен балдардын мээсин эс алдырып, аларды тапкычтыкка жана туура ойлонууга тарбияласа болот. Бул оюнда адам ар дайым кыймылда болуп тургандыктан денеге да пайдалуу», - дейт Г.Арзыкулова.

Нарын облусунун атынан катышып жаткан Нарынбек Жумалиев мелдешке өзүнүн окуучуларын алып келген.

«Кыргыз эли байыртадан эле мал чарбасы менен алектенип, малдын чүкөсүн чогултуп, кыштын узак түндөрүн чүкө ойноо менен өткөрүшкөн. Оюн адамды ички жана тышкы душмандан коргонууга, тактыкка, шамдагайлыкка, кыраакылыкка үйрөтөт», - деди ал.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×