Бөлүмдөр
Бейшемби, 18-июль
Нарын облусуАт-Башы району 23.06.2019 15:24 На русском

9 баланын демилгеси: Ат-Башыдагы жигиттер жесир жеңесине 1,5 айда үй куруп беришти (видео)

Turmush -  Ат-Башы районуна караштуу Казыбек айылында жаштардын демилгеси жана айыл элинин жардамы менен ар кайсы жерде жашап жүргөн 4 балалуу жалгыз бой энеге үй курулду. Бул тууралуу Turmush басылмасынын аймактык кабарчысы маалымдады.

Маалыматка караганда, мындан 1,5 ай мурун айылдагы жаштардан түзүлгөн 9 бала демилге көтөрүп, жалгыз бой эне үчүн үй куруп башташкан. Жаштардын бул демилгесин жергиликтүү бийлик, бир катар айыл тургундары колдоого алып, жардам беришкен. Үй алардын күнү-түнү иштеген аракети менен 1,5 айда толук бүткөрүлгөн.

«Жеңебиздин турмушу өйдө-ылдый болуп, акебизден ажырап калгандан кийин ар кимдин тамына ижара төлөп жашап жүрчү. Кээде жазда, кээде күздө, кышында үйдөн көчүп конуп келген. Үйлүү болом деп максат кылганы менен оюн ишке ашыра албай жүрдү. Анан балдар менен кеңешип отуруп бул идея жаралып, ишке ашып кетти. Эл бар, журт бар экен, баарына ыраазычылык билдиребиз. Бул иш менен гана чектелип калбайбыз. Дагы жакшы максаттарыбыз бар. Ошолорду милдеттүү түрдө аткарганга аракет кылалы деп жатабыз», - деди демилгечилердин бири Омор уулу Максат.

Айыл тургуну, демилгечилердин бири, айылдык кеңештин депутаты Болотбек Белеков үйдүн алдына суу чыгарылгандыгын да белгиледи.

«9 бала чогулуп, бул үйдүн курулушун 15-апрелде баштаганбыз. Тамдын салынышына көп кишилердин салымы чоң. Таш, шагыл түшүрүп берүүдө айыл өкмөт тарабынан жардам болду. Айыл тургундары дагы четте карап турбай, чоң жардамдарын көрсөтүштү. Терезе-эшиктеринен тарта керме шыптардан бери алып берип жатышты. Айылдагы жеңелер, келинчектерибиз биз ишти бүткүчө тамактарын жасап берип жатышты.

Негизи бул жеңенин жер тилкеси башка жакта болчу. Ал жер тилкесин азыркы үй курулган жердин ээси менен сүйлөшүп алмаштырдык. Үйдүн алдына суу тартып чыгарып бердик. Бул жерде электр мамылары жок болгондугуна байланыштуу үстүңкү көчөдөн Исмаил Жааналиев акебиз бардык уруксат кагазынан баштап, үйдүн электр эсептегичи, лампочкаларына чейин алып, жарыктандыруу тарттырып берди. Үй эмеректерин дагы акелерибиз колдоо көрсөтүп алып беришти. 3 күндөн бери тамга түлөө берип, жалпы айыл элинен бата алып жатабыз. Айыл элинен айланса болот. Бул түлөөгө куру кол келбей мал жандык тартуу кылып жатышат. Бардыгына терең ыраазычылык билдиребиз», - деди ал.

Ал эми үйдүн ээси болуп, кубанычы койнуна батпай турган Мээрим Абдыжапарова бул иш түш сыяктуу болгонун айтып, көзүнө жаш тегеренди.

«Аябай толкунданып, сүйүнүчүм ичиме батпай турат. Жолдошум каза болгонуна 3 жыл болду. Ошол жылдан бери батирлеп келгем. Кудайга шүгүр, минтип өзүмдүн кайын инилерим, эл-журтум ак өргөлүү кылышты. Тамды 1 айда эле бүтүрүштү. Түш сыяктуу эле болду. Ушул демилгени көтөргөн кайын инилериме жана элиме терең ыраазычылык билдирем. Үй-бүлөлөрү менен бактылуу болсун. Мага канча жардам беришсе кудайым аларга эки эселеп берсин. Менин балдарым дагы ушул кайын инилеримдей элдин керегине жараган балдар болсо экен деп тилейм.

Буга чейин тоого уй саап чыгып кетчүмүн. Азыркы тапта ушул кайын инилеримдин бирөөсүнүн тигүү ишканасы бар. Ошол жакта иштеп, 4 баламды багып келе жатам», - деди ал.

Айыл аксакалдары бул кылган иштери үчүн жаштарга ак батасын берип, ыраазычылыктарын билдиришти.

«Бул биздин келин болот. Жолдошу 2016-жылы кайтыш болгон. 9 бала ынтымакташып, үйүн куруп берди. Элден айланса болот, минтип колдоо көрсөтүп жатышат. Буга жетине албай сүйүнүп жатабыз», - деди Тобокел Кудайбергенов.

«Ырыс алды ынтымак» дейт. Кудайым ушул Мээрим келинибизге, 4 баласына ыйман, ден соолук берсин. Элибиздин арасында эч кайгырбай уул-кыздарын чоңойтуп жүрө берсин. Бир айта кетчү нерсе келиндин жолдошу кайтыш болгондо төркүндөрүндө алып кетебиз деген ниет болгон экен. Анан «мен барбайм, ушул жерден жылбайм, 4 баламды ар кайсы жерге тентитпейм» деп кетпей койгон экен. Бул келинибизге дагы аябай ыраазыбыз. Үй салып беришкен балдарыбызга дагы бардык жакшылыктарды тилейбиз», - деди Акматбек Райымбеков.

Айыл өкмөттүн кызматкерлери дагы бул үй-бүлөгө кандай жардамдар керек болсо көмөк көрсөтүлөрүн белгилешти.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×