Бөлүмдөр
Шейшемби, 23-июль
Ош облусуКара-Суу району 25.06.2019 18:10 На русском

Видео — Жол тескөөчү 3 жаштагы баланын өмүрүн сактап калды

Turmush -  Кара-Суу райондук ички иштер бөлүмүнүн жол кыймылынын коопсуздугун камсыздоо бөлүмүнүн кенже тескөөчүсү Эдил Шайназаров 3 жаштагы Сайидислам Шерзадовдун өмүрүн сактап калды. Бул тууралуу баланын апасы Жамиля Абдухамидова аймактык кабарчыга билдирди.

Анын айтымында, окуя болгон күнү алар үй-бүлөсү менен Ош шаарынан Кара-Суу районуна унаада бара жатышкан. Ошол учурда баласынын дене табы жогорулап, абалы начарлай баштаган.

«19-июнда Кара-Суу районуна бара жатып, жарым жолго жеткенде баламдын дене табы жогорулап, эс-учун жоготуп, көгөрүп калды. Мен кыйкырып, жолдошума "унааны токтот" дедим. Баламды дароо жолдун жээгиндеги сууга алып барып, бети-башына суу чачып жаттык. Бирок анын абалы начарлап баратты. Кайсы жактан келип калды билбейм, милиция кызматкери дароо “кеттик ооруканага, менин кызматтык унаам менен барабыз, бат жетебиз” деп, жолдошум менен баламды салып кетти. Мен ошол жерде калып калыптырмын. Алардын артынан унааны айдап, облустук жана башка ооруканалардан издеп жүрө бериптирмин. Баланы жакынкы Кара-Суу райондук балдар ооруканасына алып барышкан экен. Мен ошол кызматкерге ыраазычылыгымды билдирем, баламдын өмүрүн сактап калды», - деди Ж.Абдухамидова.

3 жаштагы Шерзаддын атасы алгач жол кыймылынын коопсуздугун камсыздаган кызматкерге «ары барчы» деп айткан.

«Балам менен убара болуп жатсам, бирөө улам эле “эмне болду?” деп жатты. Ким экенин карабай, “ары барчы” деп айтыптырмын. “Жүрүңүз ооруканага, кызматтык унаам менен жеткиребиз. Силердин унаа менен бат жеткире албайбыз. Тыгында каласыңар” деп, балам экөөбүздү унаасына салып кетти. Мен аялым бар экенин да унутуп калыптырмын. Кийин ал артыбыздан таап барды. Кызматкер мени менен 4 саат бою, балам өзүнө келгенче жүрдү. Ал кызматкердин телефон номурун албаптырмын. Ыраазычылык айтайын деп таппай калдым. Эки күн өткөндөн кийин аны Кара-Сууга бара жатканда кызматын өтөп турган жеринен көрүп калдым. Мен сени издеп жүрөм десем, ал “мен сизди издеп жүрөм” дейт. Ошондо ыраазычылыгымды билдирдим», - деди баланын атасы.

Ал эми ЖКККБнын кенже тескөөчүсү, милициянын старшинасы Эдил Шайназаров жөн гана адамдык милдетин аткарганын билдирди.

«Мен ошол күнү Ош—Кара-Суу унаа жолунун 18-чакырымындагы Тельман айылында кызматта болчумун. Жолдун жээгинде ызы-чуу болуп жаткан адамдарды көрүп, чуркап бардым. Барсам, кичинекей баланын абалы начарлап, эс-учун жоготуп коюптур. Дароо ата-баланы Кара-Суу аймактык ооруканасына алып бардым», - деди Э.Шайназаров.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×