Бөлүмдөр
Шаршемби, 17-июль
Ош облусу, Ош 02.07.2019 16:57 На русском

А.Мамажакыповдун өлүмү: Шектүү М.Калыков тоодо «Ауди» болгонун прокурордун эсине салды. Видео

Алтынбек Кожоназаров
Алтынбек Кожоназаров
// Turmush

Turmush -  Кечээ, 1-июль күнү Ош шаардык сотунда Баткен облусунун мурунку прокурору — маркум Анарбай Мамажакыповдун өлүмүнө шектүү катары кармалган капиталдык курулуш башкармалыгынын мурунку башчысы Мелис Калыковдун кылмыш иши каралды.

Сот отурумунда Баткен облустук прокуратурасынын бөлүм башчысы Алтынбек Кожоназаров күбө катары суралды. Ал окуя болгон күнү тоого аң уулоого баргандардын бири болчу.

Алтынбек Кожоназаров: - Мен 2018-жылдын 17-ноябрь күнү саат 9:00 чамасында жумушка баргам. Жумушта семинар болмок, ал саат 10:00дө башталып, 12:00 чамасында бүткөн. Эшикке чыксам, прокурорлор мени күтүп турушуптур. Саат 12:10до Төрт-Күл жакка эс алууга бардык. 1 сааттын тегерегинде Төрт-Күлгө, эс ала турган жерге жеттик. Ал жерден алып барган тамак-аш, шишкебектерди жедик.

Саат 17:00дө кайра артка жөнөдүк. Жолдо эки-үч жерден токтодук. Төрт-Күл жакка барганда ал жерде «Лексус» унаасы токтоп турган экен. Биз «Нива» менен аркасынан бардык. Ал жерде да бир аз эс алып, анан «Лексус» унаасынын артына А.Мамажакыпов отурду. Мен дагы кете берели деген ойдо алдынкы орундукка отургам. Отурсам, Мелис Калыков рулга отуруп калыптыр. Мен «унааны айдаба, Эрнистке бер» деп, унаадан түшүп, арт жакка барганда (айланып М.Калыковго бара жаткан) Мелис унааны айдап кетти. 30 мүнөт өткөндөн кийин Эмил Ажибековдун кызматтык унаасы келди. Ажибеков, Байболсунов, Эгембердиев кызматтык унаага отурушту. Эрнист, Мирлан Калыбеков, мен «Нивага» отуруп, Баткен шаарына жөнөдүк.

19:45те үйдө болуп калдым. Уктап калыптырмын. Саат 21:45 чамасында Мирлан Калыбеков «шеф жок» деп чалды. Мен «издегиле, мүмкүн кафелерде жүргөндүр» дедим. Кайра уктап калыптырмын. Саат 23:30 чамасында А.Мамажакыповдун иниси чалды. Мен «А.Мамажакыпов М.Калыков менен чогуу "Лексус" унаасында кеткен» деп айттым. Анан кайра эле А.Мамажакыповдун телефонуна чалдым. Чалсам, өчүк экен. Мирланга чалсам, «Баткен ШИИБдебиз» деди. Кийинип алып ошол жакка бардым. Таңкы саат 6:00гө чейин ошол жерде болдум.

Мамлекеттик айыптоочу: - Ошол жакка (тоого) барганда ортоңордо пикир келишпестиктер болгон эмеспи?

Алтынбек Кожоназаров: - Жок болгон эмес. Жакшы маанайда барып, жакшы эс алып келгенбиз. Эч кандай уруш болгон эмес. Сүрөткө түшкөнбүз.

Мамлекеттик айыптоочу: - Төрт-Күлгө келгенде экөө (А.Мамажакыпов жана М.Калыков) кандайча кетип калды?

Алтынбек Кожоназаров: - Мага түшүнүксүз болуп калды. Анткени мен дагы бир аз кызуу болчумун. Ага чейин «Лексусту» Эрнист айдап келген. Мен Мелиске «сен айдаба, Эрнистке бер» деп эле түшкөм. Түшкөндө эле унааны айдап кетти.

Мамлекеттик айыптоочу:- Кайтып келе жатканда куралдар кимде эле?

Алтынбек Кожоназаров: - Мен 3 мылтыкты көргөм, бирок кимдердики экенин билген эмесмин. Мылтыктарга жакшы көңүл бурбаптырмын.

Мамлекеттик айыптоочу: - Мылтыктарды кимдер, кайсы унаада алып кетишкен?

Алтынбек Кожоназаров: - Анысын билбейм.

Мамлекеттик айыптоочу: - Эрнист ошол убакта кайсы жакта эле (А.Кожоназаров М.Калыковго унааны айдаба деп жатканда)?

Алтынбек Кожоназаров: - Менин оюмча сыртта (унаанын сыртында) эле болчу.

Мамлекеттик айыптоочу: - «Лексуста» кандай куралдар бар эле?

Алтынбек Кожоназаров: - Анысын билбейм. Чынын айтсам, көргөн жокмун.

Мамлекеттик айыптоочу: - Унаада экөө эле кеттиби?

Алтынбек Кожоназаров: - Ооба

Мамлекеттик айыптоочу: - Башка эч кимди көргөн жоксузбу?

Алтынбек Кожоназаров: - Жок.

М.Калыковдун жактоочусу Сартбай Жайчибеков: - Экспертизага 4 курал берилген, сиз менен бирге иштегендер 5 курал бар болчу деп айтып жатышат.

Алтынбек Кожоназаров: - Бирөөлөрдүн колунан көргөн куралдарды айтып жатам. Ажибековдун колунан курал көрдүм, Эгембердиевдин колунан көрдүм, Мирлан Калыбековдун колунан көрдүм. Мен ошолорду айттым.

Жактоочу Сартбай Жайчибеков: - Ажибеков «менин куралым жок» деп жатпайбы.

Алтынбек Кожоназаров: - Бар болчу.

Жактоочу Сартбай Жайчибеков: - Азыр эле «ачкычты Эрнистке бер деп айттым» дедиңиз. Эмне үчүн антип айттыңыз?

Алтынбек Кожоназаров: - Төрт-Күлгө чейин унааны Эрнист айдап барган. Ошон үчүн айткам.

Жактоочу Сартбай Жайчибеков: - Эмне үчүн Мелис Калыковдун унаасын башка бирөө айдады?

Алтынбек Кожоназаров: - Ал (М.Калыков) ичкен болсо керек. Ошон үчүн Эрнист айдагандыр.

Жактоочу Сартбай Жайчибеков: - Сиз өзүңүз ичкенсизби?

Алтынбек Кожоназаров: - Ооба, ичкем.

Жактоочу Сартбай Жайчибеков: - Анда эмне үчүн медициналык текшерүүдө сизди мас эмес деп жазып жатышат?

Алтынбек Кожоназаров: - Аны билбейм. Бирок ичкем.

Жактоочу Сартбай Жайчибеков: - Экспертизага каныңызды кайсы күнү алышкан?

Алтынбек Кожоназаров: - 19-ноябрь күнү алды окшойт.

Жактоочу Сартбай Жайчибеков: - Саат канчада?

Алтынбек Кожоназаров: - Кечинде болуш керек.

Жактоочу Сартбай Жайчибеков: - А эмне үчүн башында эле каныңарды бирге тапшырган жоксуңар, силер билесиңер да бул ишти?

Алтынбек Кожоназаров: - Бизге токтомдорду тараткандан кийин анан кан беребиз, токтомдорду тарата электе эле кан берип салмак беле.

Жактоочу Сартбай Жайчибеков: - Тергөөгө эмне үчүн бардыңар анан?

Алтынбек Кожобеков: - Анткени башкармалык «баргыла» деп буйрук берген.

Жактоочу Сартбай Жайчибеков: - Силерден 5 грамм кан алып жатат, ошол каныңар 1 айдан кийин Ошко экспертизага келип жатат. Силер «эмне үчүн 1 ай кечигип калды?» деп сураган жоксуңарбы?

Алтынбек Кожоназаров: - 1 айга созулганын азыр сизден угуп жатам.

М.Калыковдун жактоочусу Асылбек Күңгуров: - Сиз «Төрт-Күлдүн жанында турганда Мелис Калыковго унааны сен айдаба деп, унааны айланып келгенче кетип калды» деп жатпайсызбы. Ошол убакта унааны айланбай эле ачкычты алып койсоңуз болот беле?

Алтынбек Кожоназаров: - Ачкыч колунда болчу да, аны тартып алмак белем.

М.Калыковдун жактоочусу Асылбек Күңгуров: - Айланып барсаңыз деле талаш болмок да?

Алтынбек Кожоназаров: - Жок, мен айланып барганда ачкычты алып, Эрнистти унаага отургузуп коймокмун.

М.Калыковдун жактоочусу Асылбек Күңгуров: - Сизде ушул ишти болтурбай коюуга мүмкүнчүлүк бар беле, эгер мүмкүнчүлүк болсо?

Алтынбек Кожоназаров - Эгер билсем, ошол эс алууга барбайт болчумун.

Шектүү Мелис Калыков: - Тоого чыгуу идеясын кимден уккансыз?

Алтынбек Кожоназаров - Мирлан Калыбеков «Төрт-Күл жакка эс алууга барабыз» деп айткан.

Шектүү Мелис Калыков: - «Ниваны» таппай бара жатканда жолдон токтоп, дүрбү менен караганда тоонун башында бир «Ауди» турган, эсиңиздеби?

Алтынбек Кожоназаров: - Ооба. «Ауди» эмес, билбейм, бир унаа турган.

Шектүү Мелис Калыков: - Тоодо жүргөндө бир унаа менен бир жакка барып келгениңиз эсимде.

Алтынбек Кожоназаров: - Мен эч жакка барган эмесмин.

Шектүү Мелис Калыков: - 12:00дөн баштап кечки саат 19:58ге чейин баарыбыз телефон менен эч ким менен сүйлөшпөптүрбүз. А сиздин телефонуңузда сүйлөшүүлөр болуп жатат.

Алтынбек Кожоназаров: - Билбейм. Мүмкүн СМС келгендир.

Шектүү Мелис Калыков: -Кимдер менен сүйлөшкөнсүз ошондо?

Алтынбек Кожоназаров: - Эсимде жок. Эч ким менен сүйлөшкөн эмесмин.

Буга чейин Turmush басылмасы шектүү М.Калыковдун жактоочусу Сартбай Жайчибеков Алтынбек Кожоназаровдун эки телефон номурун текшертүүнү суранып, судьяга өтүнүч келтиргенин жазган.

Ошондой эле жактоочу кылмыш ишине дагы тиркелген видео материалдар, буюмдар менен таанышып чыгуу боюнча өтүнүч келтирген. Бирок анын өтүнүчүн сот канааттандырган эмес. Баткен районунун ошондогу прокурору Мирлан Калыбековдун текшерүүгө берген эки телефон номурунан сырткары башка 4 номурун текшерүү боюнча өтүнүчү да канааттандыруусуз калтырылды.

Ага чейин соттук отурумдун башталышында шектүү М.Калыков эки өтүнүч билдирген.

«Мен буга чейин бул иш менен толук таанышкан эмесмин. Тергөөчү иш менен толук тааныштырбай эле ишти сотко өткөрүп жиберди. Экинчи соттук отурумга сот арачыларынын катышуусун суранам. Ал эми Конституцияда 2015-жылдан баштап сот арачылары Чүй жана Ош облусундагы соттук отурумдарга катыша алат», - деген М.Калыков.

Төрага Жолборс Кудаяров биринчи өтүнүчү боюнча мамлекеттик айыптоочулар, жактоочулар менен сүйлөшкөндүгүн, соттук иш уланып жатканына байланыштуу кылмыш иши менен тааныша албастыгын, бирок ошондой болсо да кылмыш иштин көчүрмөсүн жактоочуларына, туугандарына берип жаткандыгын айтты.

«Кылмыш иштин көчүрмөсү начар болуп калса көчүрмөлөрүн кайра берели. Экинчи өтүнүчүңүз кабыл алынды», - деген сот.

Толук маалыматты бул шилтемеден окуса болот.

Окуя тууралуу:

2018-жылы 17-ноябрь күнү саат 22:10 чамасында Баткен шаарынын Турдумаматов көчөсүнөн «Лексус 470» үлгүсүндөгү унаа табылган. Аны кароо учурунда капталдарында кандын тактары болгон.

Баткен ОИИБдин кызматкерлери түнү бою иликтөө иштерин жүргүзүшүп, анын натыйжасында Баткен шаарынын Кызыл-Жол кварталынын батыш тарабындагы участкадан Баткен облусунун прокурору Анарбай Мамажакыповдун киши колдуу болгон сөөгүн табышкан. Бул жагдай боюнча Кылмыш-жаза кодексинин (эски кодекс) 97-беренеси (адам өлтүрүү) менен кылмыш иши козголгон.

Кылмышка шектүү катары Баткен облустук капиталдык курулуш башкармалыгынын башчысы М.Калыков кармалган.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Тема боюнча:

10.06.2019Прокурор А.Мамажакыповдун өлүмү: Окуя болгон күнү тартылган сүрөттү интернетке ким тараткан? (толукталды)
10.06.2019А.Мамажакыповдун өлүмү: Ичилген арак, «Лексус 470» жана прокурордун чалуусу тууралуу көрсөтмөлөр. Видео
19.06.2019А.Мамажакыповдун өлүмү: Шектүү М.Калыков тойдо прокурорлорду тейлеген. Орун басардын көрсөтмөсү. Видео
25.06.2019«Мелис, айланайын, каякта?»: Прокурор М.Калыбеков маркум жетекчисин кантип издешкенин айтып берди. Видео
01.07.2019Прокурордун өлүмү: Сот жактоочунун номурларды текшерүү боюнча өтүнүчүн канааттандырган жок
Пикирлер
Для добавления комментария необходимо быть нашим подписчиком
×