Бөлүмдөр
Шаршемби, 17-июль
Ош облусу, Ош 09.07.2019 11:47

А.Мамажакыповдун өлүмү: Шектүү М.Калыковдун жактоочусу судьяга ишенбөөчүлүк көрсөттү

Судья Жолборс Кудаяров
Судья Жолборс Кудаяров

Turmush -  Бүгүн, 9-июль күнү Ош шаардык сотунда Баткен облусунун мурунку прокурору — маркум Анарбай Мамажакыповдун өлүмүнө шектүү катары кармалган капиталдык курулуш башкармалыгынын мурунку башчысы Мелис Калыковдун кылмыш иши каралууда. Бул тууралуу аймактык кабарчы билдирди.

Отурумдун башында шектүүнүн жактоочусу Сартпай Жайчибеков судья Жолборс Кудаяровду алмаштырууну суранды. Ал бир нече факторлорду эске алып, «кылмыш иш менен толук тааныша электе эле сот башталып кетти» деп, судья Ж.Кудаяровго ишенбөөчүлүк көрсөттү. Шектүүнүн экинчи жактоочусу Асылбек Күңгуров да С.Жайчибековдун өтүнүчүн колдоду.

Сот отурумунун төрагасы Ж.Кудаяров жактоочунун өтүнүчү боюнча мамлекеттик айыптоочулардын пикирин сурады. Мамлекеттик айыптоочулар жактоочулар буга чейин кылмыш иш менен таанышып чыгышканын, ошондуктан жактоочунун өтүнүчү негизсиз экенин билдиришти.

Маркум А.Мамажакыповдун мыйзамдуу өкүлү Мамашарип Мамажакыпов жана жакындарынын жактоочусу Назгүл Сүйүнбаева да шектүүнүн жактоочуларынын өтүнүчүнө каршы болушту.

Ал эми шектүү Мелис Калыков жактоочуларынын өтүнүчү негиздүү экенин билдирди.

Андан кийин Жолборс Кудаяров кеңешме бөлмөсүнө барды. Ал сот залына кайтып келип, шектүүнүн жактоочусунун өтүнүчүн канааттандыруусуз калтырды.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×