Бөлүмдөр
Жума, 18-октябрь
Ош облусуКара-Суу району 24.09.2019 17:47 На русском

Видео: Ош—Бишкек жолунда сатыкка чыгарылган миңдеген ашкабак

Turmush -  Кара-Суу районунда кабыгы кара ашкабакты сатып алгандардын саны өсүүдө. Бул тууралуу аймактык кабарчыга жергиликтүү тургундар билдиришти.

Ош—Бишкек унаа жолунун боюнда — Кара-Суу районунун Отуз-Адыр айыл өкмөтүндө ашкабактар сатыкка чыгарылды. Дыйкандардын айтымында, ашкабактар сентябрь айынын башында жыйнала баштаган. Учурда жолдун боюнда түрдүү түстөгү ашкабактар сатылууда. Дыйкандар кабыгы кара түстөгү ашкабактарды дарылыкка алгандардын саны көбөйгөнүн билдиришти.

Батма Токтоева жолдошу жана балдары менен бирге 3 жылдан бери 3 гектар жерде ашкабак өстүрөт.

«Витаминдери көбүрөөк ашкабактар жакшы сатылат. Мисалы, кызыл ашкабактар. Аны манты, самса жасаганга алып кетишет. Ошондой эле Казакстандын "айыма" деген ашкабагы бар, аны көбүнчө дарылык үчүн издешет. Бул ашкабактын салмагы оор, андан шире жасаса да болот. Жөнөкөй эле ашкабактар да бар. Анын баасы төмөнүрөөк. Жыл сайын ашкабактарды ортомчуларга сатып жиберчүбүз. Быйыл түшүм азыраак болгондуктан өзүбүз саталы деп чечтик», - деди Б.Токтоева.

Анын үй-бүлөсү ашкабактын уругун парникте өстүрөт.

«Мындай ыкманын түйшүгү жеңилирээк. Буга чейин дарбыз эгип жүргөнүбүз үчүн ашкабакты да ошондой эле ыкма менен өстүрүп жатабыз. Ашкабактын уругун парникте өстүрсөң, зыяндуу чөптөрдөн тазалоонун кереги жок, кетмен колдонбойсуң. Быйыл ашкабактын түшүмү азыраак. Былтыр 1 гектар жерден 7-8 унаа ашкабак алчубуз (1 унаага 400 ашкабак батат). Ошондо болжол менен 1 гектардан 3 миң 200 даана ашкабак чыгат. Кээде андан да көп болуп калышы мүмкүн, кээде аз. Негизи ашкабактын түйшүгү жеңил көрүнгөнү менен аны өстүрүү оңой эмес. Бирок бизге ашкабак өстүрүү жагат. Киреше үй-бүлөбүзгө жетет», - дейт Б.Токоева.

Кара-Суу райондук агрардык өнүктүрүү бөлүмүнүн маалыматына караганда, быйыл район боюнча 70 гектардан ашуун жерге дарбыз, коон, ашкабак эгилген.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×