Бөлүмдөр
Жума, 18-октябрь
Ош облусуӨзгөн району 26.09.2019 12:09 На русском

Эки жумадан бери изделип жаткан Нурдана табылды

Нурдана Райымжанова
Нурдана Райымжанова

Turmush -  Дайынсыз жоголду делген 15 жаштагы Нурдана Райымжанова табылды. Бул тууралуу Ош ОИИБдин басма сөз кызматы билдирди.

17-сентябрь күнү Өзгөн райондук ички иштер бөлүмүнө Мырза-Аке айылындагы М.Разаков атындагы №76 жатак мектебинин тарбиячысы М.А. арыз менен кайрылган. Тарбиячы 13-сентябрь күнү саат 18:00 чамасында 9-класстын окуучусу Райымжанова Нурдана М.Разаков мектеп-интернатынын жатаканасынан чыгып кеткен бойдон дайынсыз экенин билдирген.

Өзгөн РИИБдин криминалдык милиция кызматынын кызматкерлери тарабынан жүргүзүлгөн ыкчам издөө иш-чараларынын жыйынтыгында бүгүн, 26-сентябрда Нурдана Ош шаарынан табылып, апасына өткөрүлүп берилди. Учурда Нурдана эмне себептен жатак мектептен кетип калганын аныктоо максатында кошумча ыкчам иш-чаралар жүргүзүлүүдө.

Нурдана Райымжанова апасы менен
Нурдана Райымжанова с мамой

Буга чейин Turmush басылмасы 15 жаштагы Нурдана Райымжанованы Россияда иштеп жүргөн апасы Кыргызстанга келип издеп жатканын жазган.

«Россиядан келгенден бери өзүм чуркап жүрөм. Туруктуу жашаган жерим деле жок, ижарага батир алып жашап жатам. Интернатта окуган досторунан "сүйлөшкөн жигити бар беле, силерге бир нерсе айттыбы?" деп сурасам, шылдыңдагансып күлүшөт, башка жооп жок. Балдарымдын айтымында, мугалимдер окуучуларды үйлөрүнө алып барып жумуш жасатышат экен. Ошол күнү кызым баштык көтөрүп бара жатса, сиңдиси кайда баратканын сураптыр. Мугалиминин үйүнө бара жатканын айтыптыр. Башкалар чөнтөк телефон көтөрүп эле жүрүшөт экен, бирок кызымдын телефонун алып коюшуптур. Жүрүм-туруму деле бир калыпта, жакшы окуган кыз болчу. Эмне үчүн тарбиячылары көзөмөлдөбөйт же жоголгондугу тууралуу дароо милицияга кабарлашпайт? Жоголгонуна 11 күн болгондо гана өзүм сурагыла деп суратып жатам. Милиция кызматкерлери кызымдын сүрөттөрүн айылдын аймагына илишиптир. Ош, Жалал-Абад, Өзгөн, Кара-Суунун айрым аймактарына кызымдын сүрөтүн өзүм илип чыктым», - деген апасы Миясархан Байбубаева.

Ал эми мектеп-интернаттын директору Токтаалы Айтыкурманов Нурдана таякесиникине кеткенин билдиргенин айткан.

«Бизге 2014-жылы 4 бир тууган келген. Мектепте бардык шарттар бар, класстар да заманбап жасалган. Апасы айтып жаткандай тарбиячылар кызды үйүнө алып барып иштеткен эмес, эгер жумуш жасатканын далилдеп берсе ошол мугалимди дароо жумуштан алам. Бир гана Нурдананын эмес, анын классындагы 19 окуучунун ичинен жетөөсүнүн телефонун алып коюшкан. Себеби окууга жолтоо болот. Класстарга интернет байланышы туташтырылып, телефон колдонууга зарылчылык жок деп ойлогонбуз. Мен эмгек өргүүгө чыкканыма карабай жумушка келип жаткам. 13-14-сентябрь күндөрү жеке иштерим менен жүргөм, ал күндөр эс алуу болчу.

Нурдана 13-сентябрь күнү сабактары бүткөндөн кийин башын жууп, жасанып алып чыгып кеткен. Алдынан сиңдиси чыкканда колундагы баштыкты көрсөтүп, таякесиникине бара жатканын айткан. Ал эми жолдон иниси чыкканда таштанды таштаганы бара жатканын билдирген. Кечки тамактануу учурунда Нурдананы таппай калышып, дароо издеп башташкан. Дөң-Булакка таятасынын үйүнө барышкан. Тарбиячылар 2 күн издесек табылып калар деп мага 15-сентябрь күнү гана кабарлашкан. Ошондон бери түндө жаштар чогулган жерлерге чейин барып издеп жатабыз. Мугалимдер урушпаса, жаңжал болбосо... Апасын түшүнүп, айыптоолорун унчукпай угуп жатабыз», - деген Токтаалы Айтыкурманов.

Ош ОИИБдин маалыматына караганда, 15 жаштагы кыз жатак мектепте окугандыктан мектепте телефон колдонууга уруксат берилген эмес. Ошондуктан бир тууган эжеси телефонун алып койсо, таарынып чыгып кеткен.

Буга чейин Turmush басылмасы 15 жаштагы Нурдана Райымжанова дайынсыз жоголгонун жазган. Ал 9-класстын окуучусу.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×