Бөлүмдөр
Жума, 18-октябрь
Нарын облусуАт-Башы району 30.09.2019 14:56

Адистердин кеңеши: Оорутпай, бирок баспай калууга жана сокурлукка алып келген дарт кайсы?

Иллюстрациялык сүрөт
Иллюстрациялык сүрөт

Turmush -  Сифилис жугуштуу ооруларга кирет. Ал теринин былжырлуу катмарын, ички органдарды, сөөктү жана нерв системаларын жабыркатат. Көбү жыныстык жол аркылуу жугузуп алышат. Ушул дарттан кантип сактануу керек? Бул суроого Ат-Башы райондук үй-бүлөлүк медицина борборунун тери-венеролог дарыгери Айнагүл Ногойбаева жооп берди.

«95%ы жыныстык жол аркылуу, 5%ы башка жолдор менен (ооруган адамдын чеккен тамекисин колдонгондо, энеден балага түйүлдүк кезинде же төрөт учурунда, эмчек эмизүү учурунда) жугат. Сифилисти козгоочуларды трепонема деп коет. Анын формасы спираль сыяктуу болот.

Оорунун жашыруун мезгили 1,5-2 айга созулат. 1-2-3-стадия деп бөлүнөт. 1-стадияда оору жаңы жуккан болуп, эгер аны дарылабаса 2-стадияга өтүп кетет. Андан кийин 3-стадияга өтөт. Оору күчөгөндө көз көрбөй, жүлүнгө таасир берип, адам баспай калат. Мурдунун үстү ылдый түшүп, кеңил жери желип калышы мүмкүн.

1-стадияда кайсы жерге жукса ошол жерде жараат пайда болот. Ал оорубайт, кычышпайт, кыйнабайт, кызарып эле калат. Жашыруун түрү бар. Мында боюнда бар аялдар анализ бергенде жана башка текшерүүлөрдө чыгып калат. Же болбосо кайсы бир оору менен ооруканага жатканда табылып калат. Ошондуктан оорунун жашыруун түрү менен ооругандар “мен ооруп жатам” деп келбейт.

Союз мезгилинде сифилис, гонорея менен ооругандарды атайын диспансерде милиция кызматкери кайтарчу. Эшикке чыгарышчу эмес. Союз тарагандан кийин бир топ мекемелер кыскарып, ал жоюлуп кеткен. Жатып дарыланууну жоюп салышкан. Азыр көпчүлүгүн амбулатордук түрдө дарылайбыз. Ийне сайып, көзөмөлдөп турабыз.

Дарылоо курсу бүткөндөн кийин кайрадан анализ алабыз. Бейтаптын өзүнөн кат алынат. Себеби, бирөөгө атайын жугузса жооп берет. Бул оору эч качан өзү айыгып кетпейт», - деди ал.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×