Бөлүмдөр
Жума, 18-октябрь
Ош облусуАлай району 02.10.2019 19:19 На русском

15 жашында турмушка чыккан баатыр эне А.Мусаеванын кызын өзүнүн туугандары ала качып кетишкен

Аккыз Мусаева жолдошу менен
Аккыз Мусаева жолдошу менен

Turmush -  Алай районундагы Арпа-Тектир айылынын 83 жаштагы тургуну Аккыз Мусаева 13 балалуу болгон. Учурда баатыр эненин 60 небереси, 50 чөбөрөсү бар. А.Мусаева менен аймактык кабарчы таанышты.

Баатыр эненин жана жолдошунун аталары Улуу Ата Мекендик согушка барып, кайра кайтып келишкен эмес. Жубайлар ачкачылыкты, кыйынчылыкты көрүшкөнүн айтышты.

«Атам согуштан кайтпай калып, агам экөөбүздү апам жетелеп жүрүп чоңойтту. Жолдошум да, мен да машак терип өстүк. Терген машакты жаргылчак менен майдалап, нан жасап жечүбүз. Андан башка жей турган тамак деле жок болчу. Мектепке саман көтөрө барып, от жагып, жылынып отуруп окумуш болчубуз. Жай мезгилинде жылаңаяк эле жүрчүбүз. Жолдошума 15 жашымда турмушка чыгып, колхоздо иштедим. Жолдошум менен тең ата чөп чаап, жумуш жасачумун. Учурда белим, тамагым (бронхит) ооруйт. Айылдагылар мени “Палван (балбан) келин” дешчү экен. Балдарымды төрөп, талаада жетелеп жүрүп эле чоңойттум. Айылда депутат болуп, Бишкекке барайын дегенде кайын энем жибербей койгон»,- дейт баатыр эне.

9 кыз, 4 уулдуу болгон баатыр эненин 1 уул, 1 кызы көз жумган. Кайын энеси гана келини көп кыз төрөгөнүн айтпаса, жолдошу унчуккан эмес. Кыздарынын баары Алай районуна келин болушкан.

«Кыздарыма ким жуучу болуп келсе эле дароо макул боло бериптирбиз. Улуу кызым төрөлүп, кыркы чыга электе эле айылдаш бирөө менен кудалашып койгонбуз. Кызым чоңойгондо ошол куда түшкөн үй-бүлөнүн баласына турмушка чыккан, учурда жакшы жашап жатышат. Ал эми бир кызымды менин туугандарымдын бир баласы ала качып кетиптир. Жолдошум тез барып, кызыбызды алып кел деди. Анан туугандарымдын колунан кантип алып кетем деп, ошол жакта жөн эле жүрүп кайтып келдим. Жолдошума кызды такыр бербей коюшту дедим.

Абышкам устачылык менен алектенген адам. "Отуруп калсам бутум ооруйт" деп жумуштарды жасап жүрө берет», - дейт Аккыз апа.

Ал «Баатыр эне» наамын 1979-жылы алган. Улуу кызы учурда 67 жашта болсо, кичүүсү 34 жашта.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×