Бөлүмдөр
Шейшемби, 10-декабрь
Ош облусуКара-Суу району 26.11.2019 16:48

Кара-Сууда ата-энелер чогулткан акча кайда жумшалат? Мектептеги чыр

Иллюстрациялык сүрөт
Иллюстрациялык сүрөт

Turmush -  Кара-Суу районунун Төлөйкөн айыл өкмөтүндөгү №28 Учар орто мектебинде окуган айрым окуучулардын ата-энелери мектептеги негизсиз акча чогултууларга нааразы. Бул тууралуу ата-энелердин бири Айкөкүл Кожобердиева (аты-жөнү өзгөртүлдү) аймактык кабарчыга билдирди.

Анын айтымында, буга чейин ата-энелер мектептин фондуна 500 сомдон топтошкон. Учурда фонд «Байчечекей камкордук кеңеши» деп аталат.

«№27 Учар орто мектебинде уулум 3-класста, кызым 5-класста окуйт. Сентябрь айында жалпы ата-энелердин чогулушу өткөрүлгөн. “Балдарга грамота, медалдарды сатып алуу үчүн акча чогултабыз. Стипендиялар фонддун эсебинен берилет. Акчаларды банкка салып коёбуз” деп айтышкан. Ошондон кийин эле мектептерде акча чогултулбасын деген буйрук чыкты. Ата-энелер кайра акча бербейбиз деп чыгышты. Бир күнү балам “апа, 500 сом берет экенсиз, мугалим сурап жатат. Ата-энелер комитетине берсин деди” деп келди. Андан сырткары пол жууган кызматкерлерге деп айына 25 сомдон чогултушат. Сентябрдан бери эки балама айына 25 сомдон берип жатам. Бирок мугалимдер полду окуучуларга жуудурушат экен. Анда акчаны эмнеге берип жатабыз? Балдар муздак суу менен пол жууп, ооруп жатышат», - деди Айкөкүл Кожомбердиева.

Аталган мектепте Нургүл Садыкованын (аты-жөнү өзгөртүлдү) 3 баласы окуйт. Ал жаңы окуу жылынын башында фондго 1 миң 500 сом берген. Н.Садыкова андан сырткары дагы акча чогултуулар көп экенин кошумчалады.

«Балдарымдын тамак-ашына акча берем. Мурдагы айларда эки баламдын тамагына 250 сомдон берчүмүн. Азыр 150 сомдон болуптур. Кол аарчыганга майлык керек деп сурашканынан майлык алып барып берсем, “болбойт, окшош сатып алабыз” деп 100 сомдон чогултушту. Менин жашоо шартым оор. Ай сайын жол киреге акчаны араң таап берем. Акча деп сурай берип тажатышты. Балдарымды мугалимдери уруша бергенинен айла жок таап бердим. Менин жеңем да 3 кызына 1 миң 500 сом берген. Дагы бир жеңем 2 кызына 1000 сом берди», - деди Нургүл Садыкова.

Ал эми Учар орто мектебинин директору Кулпунай Сыдыкова негизсиз акча чогултулуп жатат деген маалыматты четке кагып, чогулган каражаттарга тиешеси жок экенин билдирди.

«Камкордук кеңеши 2014-жылы түзүлгөн. Юридикалык жактан катталган. Тиешелүү документи бар. Ата-энелер ай сайын 40 сомдон топтойбуз деп чечишкен. Биз ата-энелерден жардам сурайбыз. Окуучуларды башка мектептерге олимпиадаларга алып барганга, стипендияларды берүүгө, жылдын соңунда жакшы окуган окуучуларды сыйлоого каражат бөлүп беребиз. Грамота, медалдардын ар бирин 100 сомдон сатып алабыз. Мамлекет тарабынан бизге мындай нерселерге акча бөлүнүп бербейт. Оштогу бардык мектептерде камкордук кеңеши бар. Акчаларды ата-энелер банкка которушат. Окуучуларга керектүү акчаларды ата-энелер өздөрү банктан алып беришет. Ата-энелер комитети да башка ата-энелерге отчёт берип турушат. Пол жууган аялдарга акча чогултуу эчак эле жоюлган. Ата-энелер тарабынан 25 сомдон акча чогултулуп жатат деген факт жок. Министрлик (Билим берүү жана илим министрлиги) тарабынан чыгарылган мыйзамсыз акча чогултуу жөнүндө буйругу боюнча 26-октябрда ата-энелер менен чогулуш өткөргөнбүз. Ошол күнү министрликтин, райондук билим берүү бөлүмүнүн жана мектептин буйруктары менен жалпы ата-энелерди тааныштыргам», - деди Кулпунай Сыдыкова.

Ата-энелер комитетинин башчысы Венера Абдыкадырова чогултулуп жаткан акчалар ата-энелердин макулдугу менен топтолорун билдирди.

«Бул маселе жалпы ата-энелердин чогулушунда талкууланып, ар бир ата-эне ай сайын 40 сомдон камкордук кеңешине, 10 сомдон СМС-кат үчүн (мугалим ата-энеге баласы тууралуу маалымат берүү үчүн СМС-билдирүү жөнөтөт) берүүгө макул болушкан. Быйыл 10 сомдон чогултуу жоюлуптур. Мектепке керектелүүчү буюмдарга, окуучуларды сыйлоого каражат камкордук кеңештин эсебинен алынат. Акчалар банкта сакталат. Баары юридикалык жактан катталган. 3-4 баласы барлар бир балага гана акча беришет. Жарым-жартылай же томолой жетим балдар акча бербейт. Туура, чогулган акча эмнеге жумшалып жатканын ар бир ата-эне билгиси келет. Бул боюнча мен ата-энелерге отчет берип турам.

Быйыл мектепке камкордук кеңештин эсебинен 11 миң сом алып бердим. Анын 7 миң 300 сомун жылуулук батарейкаларын оңдоого сурашканынан бергем. Окуучулардын коомдук ишмер Батыраалы Сыдыковдун жаркын элесине арналган көргөзмөгө катышуусуна 2 миң 700 сом, 1000 сомду СМС-билдүү үчүн алып бергем», - деди Венера Абдыкадырова.

------------------------------------------------

Turmush басылмасы аталган мектепте ушул жылдын 7-октябрында 7-класстын окуучулары 5-класстын окуучусун ур-токмокко алышканын жазган.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×