Бөлүмдөр
Шейшемби, 10-декабрь
Ош облусуКара-Кулжа району 27.11.2019 15:46 На русском

Кара-Кулжада депутат менен улгайган энени сабаган айыл өкмөт башчы үй камагына чыгарылган

Иллюстрациялык сүрөт
Иллюстрациялык сүрөт

Turmush -  Кара-Кулжа районунун Кара-Кулжа айыл өкмөтүнүн башчысы балдары менен бирге жергиликтүү кеңештин депутаты жана анын улгайган апасын сабаганы үчүн кылмыш иши козголгон. Учурда тергөө иштери уланууда. Ал эми айыл өкмөт башчы үй камагына чыгарылган. Бирок сабалган депутат соттун чечимине нааразы. Бул тууралуу жабырлануучу аймактык кабарчыга билдирди.

Ушул жылдын 29-август күнү Кара-Кулжа айыл өкмөтүнүн башчысы О.А. жергиликтүү кеңештин депутаты Б.У. менен анын апасы Б.Д.ны сабаган. Ош ОИИБдин маалыматына караганда, окуя 29-августта кечки саат 20:30 чамасында Биринчи май айылында сабалган депутаттын үйүндө болгон. Эки тарап тең милицияга арыз менен кайрылышкан.

Эки тараптын урушу алгач көчөдөн башталып, андан соң депутаттын үйүндө уланган. Айыл өкмөт башчы жардамга өзүнүн 21 жана 17 жаштагы уулдарын чакырган.

Депутаттын айтымында, айыл өкмөт башчы ага ок атуучу курал такаган. Бирок Б.У. ок атуучу куралды тартып алып койгон. Ошол учурда айыл өкмөт башчы депутаттын апасын да урган.

Аталган окуя Кара-Кулжа РИИБ тарабынан Кылмыштардын жана жоруктардын бирдиктүү реестрине катталып, Жазык кодексинин 266-беренесинин 2-бөлүмүнүн 2-пункту (ээнбаштык) менен айыл өкмөт башчыга кылмыш иши козголуп, анын баш коргоо чарасы Кара-Кулжа райондук сотунда каралып, 48 саатка камакка алынган. Ал эми анын 21 жаштагы уулу үй камагына чыгарылган. Кичүү уулу өспүрүм болгондуктан камактан бошотулган.

Депутаттын ур-токмокко кабылган апасы Даткайым Байкожоева окуядан кийин ооруп калганын айтууда.

«Мен ошол күнү башымдан катуу жаракат алыптырмын. Ооруканадан дарыланып чыкканыма карабай, азыр да өзүмө келе албай жүрөм. 68 жаштамын. Андан кийин эки жолу өзүмдү жоготуп, башымдан кан алдырдым. Буга чейин мындай болчу эмесмин. Кан басымым үчүн дары ичип жүрчүмүн», - деди Д.Байкожоева.

Сабалган депутат Уларбий Байкожоев кылмыш иш Кара-Кулжа райондук, Ош шаардык, Ош облустук сотунда каралганын билдирди.

«Айыл өкмөт башчы мени сабаса мейли эле, бирок апама кол көтөргөнү туура эмес. Соттор аны үй камагына чыгарып коюшту. Ош шаардык, облустук соттор Кара-Кулжа райондук сотунун чечимин күчүндө калтырып коюшту. Ал мыйзам чегинде жаза алышы керек болчу. Эми мен Башкы прокуратурага, Жогорку сотко кайрылам. Айыл өкмөт башчы 18-сентябрь күнү кызматынан кетүү боюнча арыз жазып, арызга аким кол койгон. Бирок кайра кызматына келиптир. Менин аны иштен кетирүү тууралуу оюм жок», - деди У.Байкожоев.

Учурда Кара-Кулжа айыл өкмөтүнүн башчысынын милдетин убактылуу О.А.нын орун басары Бактыбек Жээнбеков аткарып жатат. Ал О.А. жумушка келип-кетип иштеп жүргөнүн билдирди.

«Мени айыл өкмөт башчынын убактылуу милдетин аткаруучу кылып райондук мамлекеттик администрациядан келип дайындап кетишти. Бирок үй камагына чыгарылган айыл өкмөт башчы 18-ноябрдан тартып ишке келип-кетип жүрөт. Чогулуш да өткөрдү. Мен бул боюнча райадминистрациядагы биздин айыл өкмөттү караган кураторго да телефон чалып айткам», - деди Б.Жээнбеков.

Кара-Кулжа районунун акими Примерди Дыйкановдун айтымында, айыл өкмөт башчы кызматтан кетүү тууралуу арыз жазып, бирок арызын кайра кайтарып алган.

«Айыл өкмөт башчынын иши сотто каралып жатканда Ош шаардык сотуна О.А.ны жумуштан четтетүү боюнча кайрылганбыз. Сот анын кызматы чырга тиешеси жок деп чечим чыгарып берди. Азыр мыйзам боюнча соттун чечими менен гана жумуштан алынат экен. Айыл өкмөт башчы кызматынан бошотулган жок», - деди П.Дыйканов.

Ош шаардык сотунун басма сөз кызматы айыл өкмөт башчы учурда үй камагында экенин тастыктады.

«Кара-Кулжа айыл өкмөтүнүн башчысы О.А.нын баш коргоо чарасы Ош шаардык соту тарабынан 3-сентябрь күнү каралып, 1-октябрга чейин камакка алынган. Кайра тергөө иштерине байланыштуу 25-октябрга чейин улантылган. 26-октябрь күнү Кара-Кулжа райондук сотунун токтому менен бөгөт коюу чарасы катары 30-декабрга чейин үй камагына өзгөртүлгөн.

15-ноябрь күнү Кара-Кулжа райондук прокуратурасы апелляциялык даттануу менен Ош облустук сотуна кайрылган. Ош облустук соту Кара-Кулжа райондук сотунун чечимин күчүндө калтырган. Анткени айыпталуучу бөгөт коюу чарасын кароого дарыгерлердин көзөмөлүнө келген. Анын ден соолугуна байланыштуу үй камак чарасы тандалган», - деп айтылат басма сөз кызматтын малыматында.

Үй камагындагы айыл өкмөт башчы О.А. менен байланышууга мүмкүнчүлүк болгон жок.

Буга чейин Turmush басылмасы айыл өкмөт башчы менен Б.У. мурда бажа болушканын жазган. Бирок депутат жубайы менен ажырашкан. Анын себебин Б.У. айыл өкмөт башчы менен байланыштырган.

Толук маалымат бул шилтемеде.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×