Бөлүмдөр
Дүйшөмбү, 27-январь
Ош облусуКара-Кулжа району 04.12.2019 15:31

«Аргымагын өлтүрүп коюшкан»: Бою 2,4 метр болгон Төрөбек балбандын атагы Орто Азияга тараган. Сүрөт

Төрөбек Абакиров (сол жакта)
Төрөбек Абакиров (сол жакта)

Turmush -  «Тарых инсаны» рубрикасынын кезектеги каарманы — Кара-Кулжа районунун Ылай-Талаа айылынын тургуну, балбан Төрөбек Абакиров. Анын көзү тирүү болгондо быйыл 109 жашка толмок. Балбандын боюнун узундугу 2 метр 40 сантиметрди түзүп, Орто Азияга таанылган. Бул тууралуу анын улуу келини Баарикан Базаркулова билдирди.

Анын айтымында, Төрөбек Абакировдун салмагы 130-140 килограммга чейин жетип, буту чоң, манжалары узун киши болгон.

«Кайын атам улгайып, жашы бир топко келип калса да, арык чырай, кең далылуу, ыкчам кыймылдаган киши болчу. Убагында Орто Азиянын 4 өлкөсүнө Кыргызстанды таанытып, желегин желбиретип жүрчү. Атамды тургундардын көпчүлүгү күрөш, эр эңиш, ат оюндарынын чебери катары таанышат. Улгайган адамдар атамдын минген аргымагы да өтө акылдуу болгонун, мингени жатканда төө сымал чөгөлөп, мингенден кийин кайра туруп кетчү дешет. Атам ошол аргымагы менен кошуна өлкөлөрдө өткөн мелдештерге катышып, Казакстанга барганда атын атайын өлтүрүп коюшкан. Атам аргымагын ал жакка таштабай, үйгө жүктөп алып келип, катуу кайгырган. Учурда атамдын неберелери анын жолун жолдоп, спорт чөйрөсүнө аралашып, байгелүү орундарга ээ болуп жатышат. Жунусбек Абакиров аттуу небереси өлкөнүн ичиндеги кол күрөш боюнча мелдештерде 6 жылдан бери чемпиондукту башкаларга бербейт. Неберелери атамдан калган ат жабдыктарын колдонуп, эскерип турушат. Ал тууралуу азыркы жаштарга айтсаң, жомоктой эле сезилет», - дейт Баарикан Базаркулова.

1990-жылы Төрөбек Абакировдун 80 жылдыгы белгиленген. Айыл тургундары ошол кезден бери балбан эскерилбей жатканына нааразы. 2020-жылы Т.Абакировдун 110 жылдыгын уюштуруу пландалууда.

Ылай-Талаа айылында Төрөбек Абакиров атындагы жаштардын стадиону бар. Балбан 1910-жылы туулган.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×