Бөлүмдөр
Ишемби, 18-январь
Ош облусу, Озгон 19.12.2019 17:24 На русском

Өзгөндүк жигиттин «жүрөгүн дүкүлдөткөн кыялдары» отуруштан кийин аяктады. Окуянын чоо-жайы

Иллюстрациялык сүрөт
Иллюстрациялык сүрөт

Turmush -  Ош облусунун Өзгөн райондук соту Жазык кодексинин 176-беренеси (Иш жүзүндөгү нике мамилелерине турууга мажбурлоо) менен айыпталган Абдуразак (аты өзгөртүлдү), Баглан (аты өзгөртүлдү), Аргендин (аты өзгөртүлдү) жазык иши боюнча материалдарды карап чыгып, чечим чыгарды.

Абдуразак 1991-жылы Ош облусунун Өзгөн районунда туулган. Билими орто, бойдок, убактылуу иштебейт, мурун сот жообуна тартылган эмес.

Баглан 1991-жылы Ош облусунун Өзгөн районунда туулган. Билими орто, үй-бүлөлүү, убактылуу иштебейт, мурун сот жообуна тартылган эмес.

Арген 1991-жылы Ош облусунун Өзгөн районунда туулган. Билими орто, бойдок, убактылуу иштебейт, мурун сот жообуна тартылган эмес.

Айыпкерлер Абдуразак, Баглан менен Арген 2019-жылдын 12-октябрында болжол менен саат 18:00 чамасында 2002-жылы туулган Айзираны (аты өзгөртүлдү, Ж.Н.) эркине каршы никеге турууга мажбур кылышкан.

Соттук отурумда айыпталуучу Абдуразак 2019-жылдын октябрь айынын башында
Айзира менен WhatsApp аркылуу таанышып, аны менен 7-8 жолу жолугуп, кызды жактырып калгандыгын билдирди. Анын айтымында, окуя болгон күнү, тактап айтканда 2019-жылдын 12-октябрь күнү болжол менен саат 10:00 чамасында агасынын «Дэу-Нексия» үлгүсүндөгү автоунаасын айдап алып, досу Аргенди Өзгөн шаарына жеткирип, өзү ошол жерден Айзирага жолуккан. Анын жанында тайпалаш кызы болгон. Андан кийин алар паркка барып, ал жерде саат 14:30га чейин сүйлөшүп отурушкан. Ошол маалда Арген телефону аркылуу сүйлөшүп, досу Баглан Ош шаарынан келе жатканын, ал келгенде чогуу чай ичели деп айткан. Абдуразак алар келгенде Айзираны жана анын тайпалаш кызын ээрчитип кафеге барган. Ал жерден Абдуразак тойдон бир кой келгенин айтып, ошол койду таш кордо кылып чогуу жейли деп, Арген, Баглан, Айзира жана анын курбу кызын айылдагы өзүнүн үйүнө алып барган. Ошондо ага Айзирага баш кошуп алайын деген ой келип, кызга «азыр мага баш кошосуң. Экөөбүздүн никебизди окутам. Макул болбосоң капа болосуң» деп айткан. Бирок Айзира «мен азыр жашмын. Ата-энем турмушка бербейт» деп билдирген. Ошол учурда кызга атасы телефон чалып, каякта жүргөнүн сураганда, ал «мени адамдар уурдап кетишти» деп айткан. Андан кийин Айзиректин ата-энеси милиция кызматкерлери менен келип, кызды алып кетишкен.

Айыпкер Аргендин айтымында, 12-октябрь күнү саат 12:00 чамасында досу Абдуразак телефон чалган. Андан кийин экөө Өзгөн шаарына барып, Абдуразак сүйлөшкөн кызына жолукканы кеткен. Болжол менен саат 14:30 чамасында досу Багланга телефон чалып, аны Өзгөн шаарына чакырган. Баглан келгенден кийин алар Абдуразактын автоунаасынын жанына барып, унаада эки кыз отурушканын көрүшкөн. Үч дос аталган эки кыз менен кафеге барып отурушкан. Андан соң Абдуразактын үйүнө койдун этин жегени барышкан. Ошондо Абдуразак Айзирекке баш кошом дегенде алар кыздын каршылыгына карабай үйгө киргизишкен. Андан кийин Айзиректин ата-энеси милиция кызматкерлери менен келишип, кызды алып
кетишкен.

Айыпкер Багландын айтымында, кафеден чыккандан кийин Абдуразактын үйүнө барышкан. Ошондо Абдуразак «мен бүгүн үйлөнөм, кыз каршы болсо дагы мажбурлап нике окутам, кыз эч жакка барбайт» деп айтканда, кыздар унаадан түшпөгөнгө аракет кылып каршылык көрсөтүшкөн. Бирок ага карабастан Айзиректи күчкө салып, үйгө алып киришкен. Ал эми тайпалаш кызын балдардын бири үйүнө жеткирип койгон. Баглан кыздын ата-энесине бир ооз айтып коелу дегенде Абдуразак «мен кыз каршы болсо дагы үйлөнөм» деген. Андан кийин кыздын ата-энеси милиция кызматкерлери менен келишкен.

Жабырлануучу Айзирек мыйзамдуу өкүлдүн катышуусунда көрсөтмө берди. Анын айтымында, 2019-жылдын октябрь айынын башында Абдуразак менен WhatsApp аркылуу таанышып, сүйлөшүп жүргөн. 2019-жылдын 12-октябрында саат 15:30 чамасында Өзгөн шаарындагы колледжден чыгып, тайпалашы менен жолдо бара жатканда Абдуразак автоунаасы менен келген. Үчөө паркка барып, ал жерде жарым сааттай сүйлөшүп отурганда Абдуразак «мени бирөөлөр чакырып жатат, барып келели» деген. Өзгөн шаарындагы борбордук базарга жеткенде Арген менен Багланды жолуктурушкан. Андан кийин баары кафеге барышкан. Ал жерден чыгып, Абдуразактын айылдагы үйүнө таш кордо жегени барышкан.

Алгач Айзирек менен тайпалашы унаадан түшпөй каршылык көрсөтүшкөн. Ошондо балдар Айзиректи мажбурлап үйүнө киргизишкен. Тайпалашын балдардын бири үйүнө жеткирип кеткенде Абдуразак «турмушка чыгасың. Азыр молдо алып келип сенин макулдугуңа карабастан нике окутабыз» деп айткан. Ошол маалда атасы телефон чалганда ага «мени бирөөлөр уурдап кетишти» деген. Көп өтпөй аны туугандары милиция кызматкерлери менен келип алып кетишкен. Сотто Айзирек айыпкерлерге эч кандай дооматы жок экендигин айтты.

Сот жыйынтыгында үчөөнү тең күнөөлүү деп таап, 3 жыл 6 айга эркиндигинен ажыратты. Бирок Кыргыз Республикасынын Жазык кодексинин 83-беренесинин негизинде ар бирине 1 жылдык мөөнөткө пробациялык көзөмөл белгилеп, жаза өтөөдөн бошотту.

Чечим 2019-жылдын 11-декабрында чыккан.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×