Turmush — «Мекендештер» рубрикасынын кезектеги каарманы — үй-бүлөсү менен Түштүк Кореянын Каннын шаарында жашап жаткан Самара Асан кызы. Ал Turmush басылмасынын кабарчысы менен болгон маегинде чет өлкөдөгү жашоосу тууралуу айтып берди.
Самара Асан кызы 1999-жылы Ош облусунун Ноокат районунда туулган. Анын айтымында, 2 жылдан бери Каннын шаарында жашап жатат.
«Бул жакта мейманкана, пансионаттарды тазалап иштейбиз. Тилекке каршы жогорку окуу жайда окуган эмесмин. Биз негизи Россиянын Владивосток шаарында жашачубуз. Россияда мобилизация башталып кеткенден кийин Кореяга келүүнү туура көрдүк.
Мен Кореяга 2017-жылдан бери келип кетип жүрчүмүн. Бул жактын жашоосу жаккан үчүн кайра келдим. Кореянын Каннын шаарында жашайбыз, жашоо-шарты бизге ыңгайлуу, бул шаарда кыргыздар абдан көп. Тазалыгы жана бүт шарты бар болгону менен таң калтырды. Кыргызстандан айырмасы, жогоруда айтканымдай адамдарга жашоого ыңгайлуу шарт түзүлгөнүндө», - деди ал.
Мекендешибиз аталган шаарда кыргыздар көп экенине таң калганын айтат.
«Кызыктуу учурлар аябай көп. Алгач тил билбей, көчөдө корейлер сүйлөсө түшүнбөй, күлүп тура берчүмүн. Каннын шаарында кыргыздар аябай көп, кээде өзүм да «Кореядамынбы?» деп түшүнбөй калам. Көчөдө кетип бара жатканда кыргызча сүйлөп өтүп бара жатышса, таң калып калам.
Бул жерге үй-бүлөм менен келгем, балам бар. Ал бала бакчага барат. Үй-бүлө менен бул жерде жашоо сонун, бүт шарттары бар, бакчада балаңды абдан жакшы карашат. Өздөрү унаа менен келип алып кетип, кайра кечинде алып келишет.
Кышында эркектерге иш токтоп калат. Ошол убакта аялдардын жумуштары күчөп, биз иштеп калабыз. Ошондуктан башкаларга да үй-бүлөсү менен келүүнү сунуштайт элем. Кореяда чет өлкөлүктөрдү жакшы карашат. Мен оронгон болсом да эч ким жаман көрүп, же чеч деп айтпайт. Бош убактымда велосипед тээп, жаңы жерлерди көрүп келген жагат. Ошондой эле социалдык тармак аркылуу Кореядагы жашоону чагылдырам. Келечекте мекенибизге кайтып, үй алып, жеке бизнес ачып, Кыргызстанда эле жашагым келет», - деди каарманыбыз.