Turmush — Ош мамлекеттик университетинде «Борбор Азия критикалык минералдар инновациялык борбору» пайдаланууга берилди. Бул тууралуу аталган окуу жайдан билдиришти.
Саамалыкка окуу жайдын ректору Кудайберди Кожобеков, структура жетекчилери, профессордук-окутуучулук курам, чет өлкөлөрдөн жана өлкө аймагынан келген окумуштуулар катышты. Анда бүгүнкү күндө республикада, айрыкча түштүк аймакта сейрек кездешүүчү критикалык минералдар арбын экени айтылды.
Борбор критикалык минералдарга илимий изилдөөлөрдү жүргүзүү, эл аралык уюмдар менен кызматташуу максатын көздөйт. Аны жүргүзүүдө спутниктик сандык маалыматтар да колдонулат.
Аталган жайда университеттин илим изилдөөчүлөрү, PhD докторанттары изилөөлөрдү жүргүзө алат. Ал үчүн заманбап жабдуулар жана программалар менен камсыздалды. Борбор Азиядагы Америка университетинин профессору, эксперт Сагынбек Орунбаевдин пикиринде, борбор жалпы Кыргызстандын инвестициялык чөйрөсүн өнүктүрүүгө көмөктөшөт.
«Өлкө аймагында өзгөчө сейрек кездешкен минералдардын булактары арбын. Бул багытта илимий изидөөлөрдү алып барууга ОшМУда борбор ачылып жатат. Бул борбор эл аралык уюмдар менен иштөөгө, илимий изилдөө, чалгындоо иштерин алып барууда, башка эл аралык аралык өнөктөштөрдүн интеграцияланышына салым кошот», - деди ал.
Бул долбоор таза энергетикалык технологияларды өндүрүү үчүн Кыргызстандагы кендерди туруктуу казып алууга жана колдонууга көмөк көрсөтүү максатында ишке ашууда. Ошондой эле кендердин геологиялык таралышын жана запастарын комплекстүү изилдейт.
Иш-чаранын алкагында спутниктик талдоо, ГИС, дистанттык зонддоо, агрономиялык, полеэкологиялык багыттагы илимий баяндамалар жасалды.
