Turmush — Ош облусунун Өзгөн районуна караштуу Өзгөн шаарындагы борбордук стадион капиталдык оңдоп-түзөөдөн өткөрүлүп жатат.
Шаар мэри Залкарбек Каримовдун айтымында, стадионду жакынкы 1-2 айдын ичинде пайдаланууга берүү пландалууда.
«2024-жылы март айында долбоор аркылуу 122 млн сомго келишим түзүлгөн. Кыргыз футбол биримдиги тарабынан жарыктандыруу 33 млн сомго, газон 17 млн сомго каржыланды. Оңдоодон өткөндөн кийин бардык талапка жооп берген стадион болот», - деди Каримов.
Ал эми курулуштун прорабы Афтандил Дыйканбаевдин маалыматы боюнча, стадион 3000 орунга ылайыкташкан.
«Стадион жана парк толугу менен оңдолуп жатат. Учурда административдик имаратты куруп жатабыз. Жарыктандыруулар коюлду. Эл аралык талаптарга жооп берген стадион болот. Ажаткана, жуунучу жай, спортчулар үчүн бардык шарттар түзүлүп, газон эгилет. Мындан сырткары Орто-Коргон паркы да оңдолуп жатат. Учурда таш тамандар төшөлдү. Айланасы толугу менен жашылдандырылып, отургучтар орнотулат», - деди Дыйканбаев.
Стадионду оңдоо иштерин «Ак Бата» жана «Иверия» жоопкерчилиги чектелген коомдору жүргүзүп жатат.
Turmush 2024-жылдын апрель айында Өзгөн шаарындагы борбордук стадион кейиштүү абалга кептелгенин жазган.
Стадион 1968-1970-жылдары курулган боюнча капиталдык ондоп-түзөөдөн өткөн эмес. Стадиондун отургучтары талкаланып, тосмолору да эскирип, айрым жерлери урап, ар кайсы жерлери тешилип калган.
