Turmush — Ош облусунун Өзгөн районуна караштуу Өзгөн шаарында 3 бала бакча жана 1 мектептин курулушу жүрүп жатат. Бул тууралуу шаар мэри Залкарбек Каримов билдирди.
Анын айтымында, мектеп 500 орунга ылайыкталган. Имарат Жаңы-Өзгөн кварталында курулууда.
«Тендердик баасы 262 млн сом болуп келишим түзүлгөн. Ал эми Бабур мектебинин жанында республикалык бюджеттен 140 орундуу бала бакчанын курулушу башталат. 100 орундуу эки бала бакча Курманжан датка жана Ленин мектептеринин аймагында курулууда. Эки бала бакчанын курулушу жергиликтүүү бюджеттен каржыланууда. Бул бала бакчалар сентябрь айында пайдаланууга берилет», - деди ал.
Калаа башчысы кошумчалагандай, Бабур мектебине жергиликтүү бюджеттин эсебинен спорт зал курулуп жатат. Жалпы келишимдик баасы — 27 млн сом. Объект жаңы окуу жылында пайдаланууга берилет.
