Turmush — Жайы-кышы дебей, 29 жаштагы Улан Төлөмүшов күн сайын муздак сууга түшүүнү адатка айланткан. Кыштын чилдесинде 15–20 сантиметр муз тоңгон Түп районундагы Долон көлүнүн музун чаап, сууга түшкөнү жергиликтүү тургундарды таң калтырды. Аймактык кабарчы каарман менен жолугуп, анын бул адатынын чоо-жайын сурап көрдү.
Улан Төлөмүшов ар дайым экстремалдуу оюн-зоокко кызыгып, өзүнүн тандоосуна жараша иш аракет жасайт.
«Менин ата-тегим Түп районунун Долон айылы менен байланыштуу. Өзүм Каракол шаарында чоңоюп, мурдагы Н.Нариманов атындагы жалпы билим берүү мектебин аяктадым. 2015-жылы Бишкек шаарындагы агротехникалык колледжге тапшырып, балык чарбасы боюнча ихтиолог адистигине ээ болгом. Бирок бул кесип боюнча иштеген жокмун. Учурда мезгил талабына жараша автотехникалык тейлөө тармагында эмгектенип келем. Негизи экстремалдуу нерселерди жактырам. 18 жашка чейин ата-энем тыюу салчу. Студент болуп өз алдынча жашай баштагандан кийин жайкысын күн сайын 15–20 секунд муздак душ кабыл алып жүрдүм, кийин бул адат кышкысын да уланып кетти. Мунун пайдалуу жактары бар: кан айлануу жакшырат, организм чыйралат, иммунитет бекемделет. Быйыл жыл башында жумуштук тыныгуудан пайдаланып, Долонго барып эки ирет сууга түштүм», — деди ал.
Улан Төлөмүшов үй-бүлөлүү, 1 кыздын атасы. Ал кыш мезгилинде Ысык-Көлгө жана жаратылыштагы агын сууга түшүүнү да адатка айлантканын кошумчалады.
«Мен 2018-жылдан бери муздак сууга түшүп келем. Ата-энем жана жакындарым ден соолугум үчүн кабатыр болушат. Бирок, Кудайга шүгүр, ушул күнгө чейин олуттуу ооруп калган жокмун. Ысык-Көлгө түшкөндө кээде жел же шамал болуп, кийим кийгенче сүлгү издеп каласың. Ал эми Долон көлүндө айлана-тегерек далдоо болгондуктан, андай ыңгайсыздык байкалбайт. Бала кезде тамагым ооруса ата-энем дары-дармек берчү, азыр тескерисинче, тамагым ооруса муздак суу ичип коём. Жакында сууга түшүп жаткан видеомду Instagram баракчама жүктөгөм, ал көпчүлүктү таң калтырды. Бирок мен үчүн бул кадимки эле көнүмүш адат. Бош убактымды үй-бүлөмө арнайм. Буга чейин Чехия, Дубай, Азербайжан, Россия, Казакстан жана Өзбекстан мамлекеттерине да саякаттап келдик», — деп сөзүн жыйынтыктады ал.
Посмотреть эту публикацию в Instagram