Turmush — Ош шаардык мэриясы 2 млрд сом насыя алуу үчүн төрт муниципалдык ишкананы күрөөгө койгон. Бул тууралуу мэриянын басма сөз кызматы билдирди.
Маалыматка караганда, Ош шаардык мэриясы мамлекеттен 2 млрд сом көлөмүндө кредит алган.
Насыя алуу үчүн күрөөгө коюлган муниципалдык ишканалар:
- Ош шаардык көрктөндүрүү жана жашылдандыруу чарба комбинаты;
- Ош шаардык муниципалдык автотранспорт ишканасы;
- «Ошшаарсууканал» ишканасы;
- «Ош автобекети».
Ош шаардык кеңеши 2025-жылдын 20-июнунда №51 токтом кабыл алып, муниципалдык ишканаларды күрөөгө коюуга макулдук берген.
Күрөөгө коюуга сунуштала турган Ош шаарынын муниципалдык менчик объекттери :
| Аталышы | Дареги | Жер тилкенин аянты (м²) | Жанаша жайгашкан жерлердин базардагы баасы, сом |
| «Оштогу көрктөндүрүү жана жашылдандыруу чарба комбинаты» МИ | Кол өнөрчүлөр көчөсү | 5 235,00 | 353 230 000,00 |
| Ош шаарынынмуниципалдык автранспорт ишканасы | С.Касымбеков көчөсү №21 | 20 982,00 | 553 885 000,00 |
| «Ошшаарсууканал» МИ | Иминов көчөсү | 95 000,00 | 1 334 762 000,00 |
| «Ош автобекети» МИ | В.Ленин көчөсү №942 | 33 100,00 | 1 083 629 000,00 |
| Жалпы: | 154 317,00 | 3 325 506 000,00 |
----------------------------------------------------
Кечээ, 9-мартта Ош шаарынын мурдагы мэри Жеңишбек Токторбаев Turmush басылмасына берген комментарийинде мэр болуп турган учурда мэрия өкмөттөн жылдык 1 пайыз менен алты жылдык мөөнөткө жана бир жылдык жеңилдетилген (льготтук) мезгил менен 2 млрд сом кредит алынганын тастыктаган.
Анын айтымында, бул каражат шаар инфраструктурасын оңдоого багытталмак. Бул үчүн өкмөткө жана Жогорку Кеңешке кат жазылып, депутаттардын колдоосу менен каражат бөлүнгөн. Акча эки бөлүк менен 1 млрд сомдон берилген.
«Бул 2 млрд сомдун 1 млрд 100 млн сомун Ош шаардык жолдор башкармалыгына бергенбиз. Андан сырткары 300 млн сомду жергиликтүү бюджеттен жана Турукташтыруу фондунан алынган 2 млрд 200 млн сомдун 100 млн сомун да жолдор башкармалыгына бергенбиз. Калган 100 млн сом капиталдык курулуш башкармалыгына берилген. Натыйжада шаарда көп көчөлөр оңдолуп, жалпысынан 70 көчө жасалды», - деди Токторбаев.
----------------------------------------------------
2026-жылдын 4-мартында Ош шаардык кеңешинин кезектеги сессиясында карыз тууралуу маселе көтөрүлдү. «Мурас» фракциясынын депутаты Бекболот Арзиев 2025-жылдагы болжол менен 1,5 млрд сомдун тегерегиндеги шаар карызы кыска убакытта кантип көбөйүп кеткенине кызыкты.
Мэр Жанарбек Акаев карыз маселеси боюнча Эсептөө палатасы тарабынан текшерүү иштери башталганын, анын жыйынтыгы боюнча жооп берерин билдирген.
Ош шаарынын мэриясынын жетекчилиги алмашкандан кийин муниципалитеттин көп өлчөмдө карызы бар экени тууралуу маалымат тараган.