Turmush — Ош шаарында Министрлер кабинетине караштуу Жазаларды аткаруу мамлекеттик кызматынын №25 мекемесине жакын жердеги курулуштардын мыйзамдуулугун текшерүү демилгеленди.
2026-жылдын 16-февралында Ош шаарынын мурдагы мэри Жеңишбек Токторбаев катышкан рейд учурунда Жазаларды аткаруу кызматынын №25 мекемесине жакын жайгашкан турак жайлар боюнча маселе көтөрүлгөн.
Рейд маалында Токторбаев бул аймакта жашаган жарандарды көчүрүп, алардын ордуна аялдама жана унаа токтотуучу жай уюштуруу сунушун айткан.
Бүгүн, 10-мартта Ош регионалдык шаар куруу жана архитектура башкармалыгы бул жер коомдук аймак эмес, №25 тергөө абагына тиешелүү экенин билдирди. Бирок бул маалымат коомчулукта бир катар суроолорду жаратты. Эгер жер тилкеси абактын аймагына тиешелүү болсо, анда эмне үчүн санитардык-коргоо зонасы сакталган эмес? Ал эми кайтаруудагы объекттин аймагы болсо, эмне үчүн жарандардын кирүүсүнө мүмкүнчүлүк берилген?
Юрист-жактоочу Жылдыз Кадырованын айтымында, мыйзам боюнча жаза аткаруу мекемелеринин айланасындагы санитардык-коргоо зонасы 100 метрден кем болбошу керек.
«Бул аралыкта турак үйлөрдү курууга болбойт. Ошондой эле мектеп, бала бакча, оорукана жана башка коомдук мекемелер жайгашпоого тийиш. Бул талаптар шаар куруу мыйзамдары жана Министрлер кабинетинин эпидемиологиялык нормалары менен бекитилген. Эл көп чогулуучу объектилерди курууга тыюу салынат», - деди ал.
Учурда №25 тергөө абагына жакын жерде Ош шаардык ички иштер башкармалыгына тиешелүү делген «Ак жолтой» бала бакчасы жайгашкан. Мындан сырткары дүкөндөр жана чакан тамактануучу жайлар да бар.
Жазаларды аткаруу кызматынын басма сөз кызматы бул аймактагы объектилер боюнча жакын арада толук маалымат берилерин билдирди.
№25 тергөө абагы жайгашкан имарат XIX кылымга таандык деп айтылат. Ал Ош шаарынын борбордук бөлүгүндө жайгашкандыктан бул убактылуу кармоочу жайды шаардан сыртка көчүрүү маселеси бир нече жылдан бери көтөрүлүп келет. Бирок азырынча аны качан жана кайсы аймакка көчүрүү пландалып жатканы тууралуу расмий маалымат жок.
Бул жай эл арасында «Камчыбектин түрмөсү» деген ат менен белгилүү. 1890-жылдары Алымбек датка менен Курманжан датканын уулу Камчыбек соодагерлер үчүн кербен сарай курдурган. Кийинчерээк орус бийлиги келгенден кийин имарат тергөө абагы катары пайдаланылган. Айрым маалыматтарда 1894-жылы Камчыбек орус бажы кызматкерлерин өлтүргөн деген айып менен кармалып, дал ушул абакта камакта отурганы айтылат.