Turmush — Жогорку сот Талас раойнундагы айылдардын биринде дүкөн иштеткен кошуна аялга жаракат келтирген адамдын ишин карады. Turmush басылмасы кылмыштын чоо-жайын баяндайт.
- Иштин материалдары Мамлекеттик сот актыларынын реестрине жарыяланды.
Айыпталуучу Боруке (аты өзгөртүлдү М.Б.Б.) 1957-жылы Талас районундагы айылдардын биринин тургуну. 2 баланын атасы. Иштебейт, пенсионер, мурда соттолгон эмес.
Тергөөнүн маалыматына караганда, Боруке 2025-жылдын 19-апрель күнү саат 12:00 чамасында мас болуп, кошунасы иштеткен «Айдана» дүкөнүнө барган. Ал жерде сатуучу Аяргүл (аты өзгөтүлдү Г.А.) ага башка тамеки сатканы үчүн ачуусу келип, нараазычылыгын билдирген. Ортодо келишпестик болуп, Аяргүлдүн өмүрүн кыюуну көздөп, үйүнөн алып келген темир балта менен аны башка 4-5 жолу чаап жиберген. Аяргүл алсыз абалда олтуруп калган маалда өзүнүн үйүнө кетип калган. Бирок баштаган кылмыштуу жосунун аягына чейин чыгаруу максатында кайра дүкөнгө кайтып келген. Бирок ошол маалда Аяргүлдүн күйөөсү Жаманбай (аты өзгөртүлдү Б.Ж.) дүкөнгө келип, эшикти жаап койгонго жетишкен. Боруке дүкөндүн эшигин балта менен чапкылап, бузуу жолу менен кирүүгө аракет жасаган. Бирок Борукенин бир тууганы көрүп калып, тынчтандырып үйүнө жетелеп кеткен.
- Соттук медициналык экспертизанын 2025-жылдын 20-майындагы корутундусуна ылайык, Аяргүлгө өмүргө коркунуч жараткан оор залал келтирилген.
Боруке Талас райондук сотунун 2025-жылдын 23-июлундагы өкүмү менен Кылмыш-жаза кодексинин 130-беренесинин 2-бөлүгүнүн 12-пункту (бейбаштык максатта ден соолукка оор залал келтирүү) менен күнөлүү деп табылып, 6 жылга эркиндигинен ажыратылган.
Боруке өзү облустук сотто күнөөсүн мойнуна алган эмес. Ал 2025-жылдын 19-апрель күнү мас болуп, түшкө маал үйүнө келгенин айтып берген. Үйдөн аялы Гүкүштү «тамеки алып кел» деп кошунасынын дүкөнүнө жиберген. Аялы дүкөндөн ал чеккен тамеки жок экен деп башка тамекини алып келген. Аялын кайра дүкөнгө жиберген. Бирок ал дүкөндөн келбей калганынан артынан дүкөнгө барып, сатуучу Аяргүлгө «мен башка тамеки чегем го» дегенде ал «мен кандай тамеки берсем ошону чегесиң» деп жооп берген. Ошого ачууланып, колуна көтөрө келген дарбазаны жаба турган темири менен аны 2 жолу уруп жиберген. Ага «сени өлтүрөм» деп айткан эмес. Дүкөндөн үйүнө барып аялын таппай, кайра дүкөнгө келген. Кайра келе жатканда колуна балта алып келген. Келип дүкөндүн эшиги жабык турганын, эшигин балта менен урган.
Ал Талас райондук сотунун 2025-жылдын 23-июлундагы өкүмүн өзгөртүп, пробациялык көзөмөл колдонуу менен эркиндигинен ажыратуу жазасынан бошотуп берүүнү суранган.
Соттук отурумда жабырлануучу Аяргүл дагы маалымат берген. Ал 2025-жылдын 19-апрель күнү саат 12:00 чамасында дүкөнүндө соода кылып олтурган мезгилде кошунасы Борукенин аялы Гүкүш келип карызга тамеки сураган. Бирок ал сураган тамеки түгөнүп калганын айтканда «башка тамеки болсо да бер» деп башка тамеки алып кеткен. Арадан бир аз убакыт өткөндөн кийин Боруке дүкөнгө колуна темир балта көтөрүп келип, «эмнеге башка тамеки бердиң?» деп ызаланып жанына келип, ийнинен менен катуу кармап, темир балта менен башка 5-6 жолу уруп жиберген. Алган жаракатынан башы айланып олтургучка сүйөнүп олтуруп калганда, Борукке дүкөндөн чыгып кеткен. Эптеп ордунан туруп, үйдүн короосуна жетип, жолдошун чакырып, ал ооруканага алып барган.
Боруке менен буга чейин эч кандай чыр-чатактары болгон эмес. Ал биринчи инстанциядагы соттук отурумда кечирим сураган. Бүгүнкү күндө ден соолугуна байланыштуу дарыланууну улантканын көрсөтүп, айыпталуучуну камактан бошотууга каршы экенин айткан.
Прокурор болсо Талас райондук сотунун 2025-жылдын 23-июлундагы өкүмүн өзгөртүүсүз, апелляциялык даттанууну канааттандыруусуз калтырууну суранган болчу.
Бул иш кайрадан 2025-жылдын 7-октябрында Талас облустук сотунда каралып, Талас райондук сотунун 2025-жылдын 23-июлундагы Боруке жөнүндөгү өкүмү өзгөртүүсүз, апелляциялык даттануу канааттандыруусуз калтырылган.
Бирок анын жактоочулары бул өкүмдөргө макул болбой, Жогорку сотко кассациялык даттануу келтиришкен. Алар эки инстанциядагы соттоордун өкүмдөрүн өзгөртүп, Кылмыш-жаза кодексинин 82-беренесинин (пробациялык көзөмөлдү колдонуу менен жазадан бошотуу) негизинде пробациялык көзөмөл колдонууну суранышкан.
Жогорку соттун өкүмү:
Жогорку сот 2025-жылдын 17-декабрында иштин материалдарын карап чыгып, Талас райондук сотунун 2025-жылдын 23-июлундагы жана Талас облустук сотунун 2025-жылдын 7-октябрындагы өкүмдөрүн күчүндө калтырды. Борукенин жактоочуларынын кассациялык даттануулары канааттандыруусуз калтырылды. Токтом акыркы, даттанууга жатпайт.