Turmush — Бүгүн,11-мартта Ош облусунун Кара-Суу районундагы унаа жолго таш кулады. Бул тууралуу ӨКМдин Ош облустук башкармалыгынан билдиришти.
Ынтымак айыл аймагындагы Жаңы-Арык—Кызыл-Суу ички чарбалык унаа жолунун 17-чакырымына тоо боорунан таштар кулап, жол жабылган. Алдын ала маалымат боюнча, жабыркагандар жок.
Жолду тазалоо иштерине №45 жол тейлөө ишканасынан 1 жүктөгүч техника тартылып, тиешелүү иштер жүргүзүлүүдө.
Ал эми Кара-Суу районунун акими Чыңгыз Бапаев Turmush басылмасына берген комментарийинде жолду тазалоо иштери жүрүп жатканын билдирди.
«Тиешелүү техникалар жиберилди. Учурда эки жүктөгүч техника иштеп, жол тазаланып жатат. Жолго келтирилген чыгым азырынча тактала элек», - деди ал.