Бөлүмдөр
Шейшемби, 12-ноябрь
Ош облусу, Ош 23.06.2016 16:59

Айыл турмушу: М.Хусенов 15 жылдан бери атайын Рамазан айында нишалла жасап сатат (фото)

Turmush -  Ош шаарынын тургуну Мырзо Хусенов аппараттардын жардамысыз, өз колу менен нишалла жасап сатат. Ал бул иш менен жыл сайын Рамазан айында алектенет.

«Ар бир майрамдын өзүнчө шириндиктери болот. Жаңы жылдын көркү торт, мандариндер болсо, Рамазан айынын шириндиги — нишалла. Башка шириндиктерден өзгөчөлөнгөн нишалланын даамын азыркы жаштарыбыз билбей келет. Мурда нишалла көп жерде жасалчу. Кардарлар дагы көп эле. Бирок, азыркы күндө нишалланын даамын таткандар да, аны жасап саткандар да азайып баратат. Мен бул шириндик унутта калбасын деп 15 жылдан бери Рамазан айында жасап сатып келем. Нишалла таттуу, ашказанга жеңил сиңүүчү шириндик. Аны даярдоо көп убакытты талап кылат.

Нишалланы жасоо үчүн жалпы 5 саат убакыт талап кылынат. Өсүмдүктүн тамырын кайнатып, анын суусу чыккандан кийин кумшекер менен жумуртканы аралаштырып, 4 саат кайнатылат. Атайын 85 см болгон чөптөр менен урулуп, чабылат.

Нишалланы аппарат менен жасаса болот. Бирок, мен өз колум менен даярдагым келет. Нишалла көп эмгекти талап кылган шириндик. Ошол себептен аны жасагандардын саны азайып кетүүдө.

Мен нишалланы даярдоо үчүн керектелген чыгымды актоону ойлонбойм, аны Рамазан айында соопчулук үчүн жасайм», - деди М.Хусенов.

Хусенов нишалланы бир жолу колдонулуучу желим идиштерге салып, граммына жараша 30-50 сомго баалайт.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×