Бөлүмдөр
Жекшемби, 22-сентябрь
Ош облусуКара-Кулжа району 03.09.2019 10:33

23 жыл кулчулукта жүргөн Зуура Болтоева. Апасын бир жолу көргөн уулу кайра кабар алган жок

Turmush -  Тагдырдын татаал сыноосуна кабылган Зуура Болтоева 23 жылдан кийин жарым жан болуп Кыргызстанга кайтып келген. Ал 1995-жылы жетпеген турмуштун айынан бакыт издеп, жакшы жашоону үмүт кылып, Казакстандын тамеки талаасына айылдашын ээрчип кеткен. Анын бир тууган эжеси Соня Болтоева сиңдисинин учурдагы абалы тууралуу аймактык кабарчыга айтып берди.

Зуура Болтоева Кара-Кулжа районунун Биймырза айылында өскөн. Ал айылдашына турмушка чыгып, уулдуу болгондон кийин эки жолго түшүшкөн. З.Болтоеванын айтымында, мындан 24 жыл мурун айылдашы иштеп кел деп сунуштап, апасын көндүрүп, азгырып Казакстанга алып кеткен. Ошол убакта Зууранын колундагы 3 жаштагы уулу кайын энесинин колунда калган.

Соня Болтоева сиңдисинин жалгыз 27 жаштагы уулу апасы менен бир жолу учурашкан бойдон кайра кабар албай койгонун айтты.

«Сиңдим Казакстанда башынан көп жаракат алыптыр. Түнү менен уктай албай, “башым” деп чыгып кетет. Дарынын күчү менен эле уктап жатат. Неврология бөлүмүнө, андан соң жакында эле психикалык ооруканага жаткырдык. Жумушка жараксыз, ден соолугу жол бербейт. Ошондуктан майыптыкка чыгарып коелу дегенбиз, психикалык оорукана аныктама берсе аракет кылам. Ал аныктаманы дарыгер гана колуна берет экен. Уулу болсо келгенде бир жолу көрүшкөн, ошол бойдон кайра кабар албай койду. Телефонун өчүрүп салыптыр. Апасы табылганга чейин “эже, апамды таап бериңиздерчи” деп ыйлап кетчү эле. Апасынын оорукчан экенин билип тоготпой жатат», - дейт Соня Болтоева.

Буга чейин Turmush басылмасы Зуура Болтоева жөнүндө жазган. Ал учурда 52 жашта.

Бурмакан Болтоеванын айтымында, эжеси ден соолугунан гана эмес, акыл-эсинен дагы жабыркаган.

«23 жылда 3 байдын колунда иштептир. Алардын бири тамак-ашты дагы аяп, ачка калтырып койчу экен. Талаада жашаган күндөрү болуптур. Бир жолу курсагы ачканда нан уУрдап жегени үчүн чайнекте кайнап жаткан суу менен урган экен. Башы жырылыптыр. Баарын эстегенде ыйлап айтып берип жатат.

Оорулуу болуп калыптыр. Биз эжемдин дарегин уккандан кийин аны алып кеткен адамдын үстүнөн Кара-Кулжа РИИБге арыз жазганбыз. Учурда анын инилери чакырып, бизди арызыңарды алгыла деп коркутуп жатышат», - деген ал.

Толук маалымат бул шилтемеде.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×