Бөлүмдөр
Жума, 15-ноябрь
Ош облусуНоокат району 25.10.2019 12:29 На русском

Шашкан айдоочу, мерт кеткен 5 жүргүнчү жана жалгыз кызынан айрылган атанын ыйы. Видео

дтп, тойота эстима
дтп, тойота эстима

Turmush -  Ноокат райондук сотунда Жазык кодексинин 297-беренеси (Автомототранспорт каражаттарынын кыймылынын жана аларды эксплуатациялоонун коопсуздук эрежелерин бузуу) жана 135-беренесинин 2-бөлүгүнүн 2-пункту (Этиятсыздыктан киши өлтүрүү) менен айыпталган Зияш (аты өзгөртүлдү, А.З.) менен Сабырдын (аты өзгөртүлдү, Н.С.) кылмыш иши каралды. Бул тууралуу соттун токтомунда айтылат.

Айыпталуучу Зияш Кадамжай районунун 1982-жылы туулган тургуну. Жогорку билимдүү, мурда соттолгон эмес. Үй-бүлөлүү, 5 баланын атасы. Ушул жылдын 9-февралында камакка алынган.

Айыпталуучу Сабыр Сузак районунун 1986-жылы туулган тургуну, мурда соттолгон эмес. Үй-бүлөлүү, 2 баланын атасы. Ушул жылдын 8-февралында камакка алынган.

Turmush басылмасы ушул жылдын 6-январь күнү саат 08:16 чамасында Ош—Исфана унаа жолунун 73-чакырымында, тактап айтканда Ноокат районунун Өрнөк айылында «Тойота Эстима» үлгүсүндөгү жеңил унаа менен жүк ташуучу унаа кагышканын жазган. Кадамжай районунун тургуну А.З. башкарып бара жаткан «Тойота Эстима» унаасы карама-каршы тилкеде Сузак районунун 1986-жылы туулган тургуну Н.С. башкарып бара жаткан битум ташуучу «МАН-26-464» үлгүсүндөгү жүк ташуучу унаа менен кагышкан. Анын кесепетинен «Тойота Эстиманын» жүргүнчүлөрү — 2001-жылы туулган И.у.Т. жана 1990-жылы туулган Ш.М. окуя болгон жерде каза болгон. Маркумдар кызыл-кыялыктар болушкан.

Ошондой эле Бишкек шаарынын Ала-Арча конушунун 1999-жылы туулган тургуну К.П. ооруканага жетпей көз жумган. Мындан сырткары 1995-жылы туулган У.У., 1975-жылы туулган Ш.А., 1992-жылы туулган У.Б., 1999-жылы туулган З.Г. жана «Тойота Эстиманын» айдоочусу А.З. денесинен жаракат алып, Кызыл-Кыя шаардык ооруканасына жеткирилген.

Кийинчерээк 3 адам ооруканадан көз жумган.

Сот отурумунда айыпталуучу Сабыр (жүк ташуучу унаанын айдоочусу) күнөөсүн мойнуна алган жок. Өзүнүн айтымында, ал окуя болгон күнү Баткен облусуна битум жеткирип, Кызыл-Кыя шаарынан кайтып келе жатканда анын тилкесине «Тойота Эстима» унаасы чыга калган. Сабыр жеңил унаанын айдоочусуна «жолду бошот» деп унаасынын фарасы менен белги берген. Бирок «Тойота» ага жол бошоткон эмес. Сабыр жеңил унаанын айдоочусу уктап кетти деп ойлоп, өзүнүн унаасын шашылыш түрдө жолдун сол тарабына (бош тилкеге) бурган. Бирок ага карабай жүк ташуучу унаа «Тойотанын» сол капталын, андан өтүп жолдун четиндеги дүкөндү сүзүп токтогон. Сабыр окуя болгон учурда унаасында жалгыз болгон. Ал Кызыл-Кыя шаарында эс алып, анан жолгон чыкканын белгиледи.

Сот отурумунда «Тойота Эстиманын» айдоочусу Зияш дагы күнөөсүн мойнуна алган жок. Анын айтымында, ал унаасын Бишкек шаарынан Кызыл-Кыя шаарын көздөй башкарып бара жаткан. Кара-Көл шаарынан жүргүнчүлөр менен бирге тамактанып, андан кийин Жалал-Абад шаарындагы ашканалардын биринде уктаганын билдирди. Зияштын айтымында, Ноокат районунун Өрнөк айылындагы бурулуш жерден өткөндөн кийин карама-каршы тилкеде жүк ташуучу унаа келе жатканын көргөн. Ошол учурда өзүнүн тилкесиндеги чоң таштан качып, каршы тилкеге чыгып кеткен. Унаасын кайра өзүнүн тилкесине бурганда жүк ташуучу унаа дагы анын жолуна бурулуп, жол кырсыгына учураган. Зияш окуя болгон учурда унаасын 50-60 чакырым ылдамдык менен башкарганын, жүргүнчүлөрү ошол учурда уктап жатышканын кошумчалады.

Сот отурумунда бир жабырлануучунун мыйзамдуу өкүлү Т.К. дагы суралды. Т.К. кырсыктан каза болгон кыздын атасы. Анын айтымында, маркум кызы окуя болгон күнү саат 6:30 чамасында Ошко жеткенин билдирген. Ошондо Т.К. айдоочу унааны катуу ылдамдыкта башкарып бара жатат деп ойлогон. Т.К.нын айтымында, «Тойота Эстимадагы» жүргүнчүлөр Жалал-Абад шаарында гана токтоп эс алышып, кайра жолго чыгышкан. Кырсыкка чейин «Тойота» бир жолу чайкалган. Эртеси Т.К. жумушта жүргөн учурда ага кызы жол кырсыкка кабылганын айтышкан. Ал Бишкек шаарынан Кызыл-Кыя шаарына чейин жеткиче кызы көз жумган.

Ал кызын акыркы сапарга узатуу зыйнатына айыпталуучу Зияштын эки агасы барып, бирок ага жолукпай кетишкенин билдирди. Т.К. «Тойотанын» айдоочусун 40 күн күткөнүн, бирок Зияш кечирим сурап келбегенин билдирди. Ошондой эле ал айдоочуну кечире албай турганын айтты. Т.К.нын айтымында, кызы 4-5 жашка чыкканда жубайы менен ажырашкан. Маркум кызы жогорку окуу жайында 1-курста окуп жаткан. Ал айыпталуучу Зияш анын тууганы экенин дагы кошумчалады.

Күбө катары суралган «Тойота Эстиманын» жүргүнчүсү У.Б. Зияш унаасын катуу ылдамдыкта айдаганын билдирди. Алар Чычкан капчыгайынан токтоп эс алышпаганын, Жалал-Абад шаарында гана токтошконун билдирди. Ошондой эле Ноокат шаарынан өткөндөн кийин унаа 2-3 жолу эки жакка чайпалганын, Зияштын уйкусу келгенин белгиледи. У.Б. жолдошу Ш.М. каза болгонун 2 күндөн кийин билген.

Ошондой эле жабырлануучулардын мыйзамдуу өкүлдөрү Р.Б. жана З.Х. «Тойота Эстима» Бишкек шаарынан 5-январь күнү кечки саат 19:30 чамасында Кызыл-Кыя шаарын көздөй чыкканын, Жалал-Абад шаарына чейин токтобой катуу ылдамдыкта келгенин айтышты.

Сот отурумунда Зияштын бир тууган агасы А.И.нин уулу дагы ошол жол кырсыкта каза болгону белгилүү болду.

Жыйынтыгында Ноокат райондук соту «Тойота Эстима» унаасынын айдоочусу Зияшты күнөлүү деп таап, Жазык кодексинин 297-беренесинин жана 135-беренесинин 2-бөлүгүнүн 2-пунктунун негизинде жалпы 4 жылга транспорт каражаттарын башкаруу укугунан ажыратуу менен бирге 8 жылга эркинен ажыратты.

Жүк ташуучу унаанын айдоочусу Сабыр дагы күнөөлүү деп табылып, Жазык кодексинин 297-беренесинин жана 135-беренесинин 2-бөлүгүнүн 2-пунктунун негизинде жалпы 4 жылга транспорт каражаттарын башкаруу укугунан жана 8 жылга эркинен ажыратылды.

Ошондой эле айыпталуучулар жабырлануучунун мыйзамдуу өкүлү Т.К.нын пайдасына 100 миң сом моралдык зыян төлөп беришет.

Нааразы тараптар 30 күндүн ичинде Ош облустук сотуна даттанууга жана сунуш келтирүүгө укуктуу.

Соттун өкүмү 8-октябрда чыккан.

-----------------------------------------------------

«Баракелде» басылмасынын маалыматына караганда, каза болгон 5 адамдын бири — Перизат 2019-жылдын 25-январында 20 жашка толмок. Ал Ош шаарындагы лицейди 2017-жылы аяктап, Ж.Баласагын атындагы Кыргыз улуттук университетинин англис тили факультетинде жогорку билим алып жаткан. Ошондой эле каратэ менен машыгып, комуз жана гитара чертчү.

Перизат Козубекова

-----------------------------------------------------

Маркум Мукамбет Шайдуллаев ата-энесинен айрылгандан кийин жалгыз иниси менен калган. Жубайы экөө алгачкы перзентин тарбиялап жаткан эле.

Кырсык болгон учурда анын жанында 27 жаштагы жубайы да болгон. Ал катуу жаракат алып, дарыланып чыккан.

Маркум Мукамбет Шайдиллаев

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×