Бөлүмдөр
Ишемби, 23-ноябрь
Ош облусуАраван району 31.10.2019 10:05 На русском

«Эң жалкоо багбандын иши»: А.Эргашов курманын дарылык касиеттери жөнүндө айтып берди. Видео

Turmush -  Араван районунун Алля Анаров айыл өкмөтүнө караштуу Ачы айылынын тургуну Алишер Эргашов багбанчылык менен алектенет. Анын багында курма, алма, кайналы, кокон гиластын көчөттөрү тигилген. Бирок алардын көпчүлүк бөлүгү курманын көчөттөрү. Багбан менен аймактык кабарчы таанышты.

А.Эргашовдун айтымында, курма өстүрүү башка мөмө-жемиштерди өстүрүүгө караганда бир топ жеңил. Ал курманы өстүрүүнүн сырларын, анын ден соолукка кандай пайдасы бар экенин, кайсы ооруларга дабаа экенин айтып берди.

«Курманын дарылык касиети көп экен. Кант диабети, богок, ашказан, ичеги-карын жана башка бир катар ооруларга дары. Богок, кант диабетине "лимон" курмасы (лимонный) деген түрү дары. Курманын түрлөрү көп. Менин багымда анын бардык түрү өсөт. Ал эми базарда "шокалад" түрүнө суроо-талап көп болот. Экспорттоого "лепёшка", "лимон" түрлөрү ылайыктуу. Себеби алар эзилбейт, каттуу болот», - дейт багбан.

А.Эргашов курма багын өстүрүү эң жалкоо багбандын иши экенин кошумчалады.

«Курма өстүрүү өтө оңой экен. Анын көчөтүн, мөмөсүн да курт жебейт. Алма, шабдалы, кокон гилас, кайналынын бактарын гүлдөп баштагандан, терип бүткөнгө чейин дарылайсың. Курманын бактарын бир да жолу дарылабайсың. Кышында түбүнө селитра же малдын кыгын салып коём. Маал-маалы менен сугарып турабыз. Жайкы чилдеде сугаруу пайдалуу», - деди багбан.

Ал түшүмүн жергиликтүү базарларда сатат.

«Азырынча түшүмдү чет өлкөгө эскпорттой элекмин. Бирок өзүбүздүн базарларда кардарларымды таптым. Жакында түшүмдү жыйнайм. Сатып алуучулар өздөрү келип алып кетишет. Азырынча көчөттөрүм кичинекей, келечекте чет өлкөгө эскпорттоону пландап жатам. Бактын аянтын дагы чоңойтуп, көчөттөрдүн түрүн эксем деп максат койгом. Мен багбанчылыктан тышкары башка жумуштар менен алектенип көрдүм. Айдоочу болдум, унаалардын кыймылдаткычтарын оңдоп иштегем. Өзүм Ооган согушунун ардагеримин. Эми жашым өтүп калганда бак тигип, анын үзүрүн балдарым, небере-чөбөрөлөрүм көрсүн деп жүрөм», - дейт Алишер Эргашов.

Бул макала Turmush басылмасынын интеллектуалдык жана автордук менчиги болуп саналат. Материалды сайттан көчүрүп алуу редакциянын жазма уруксаты менен гана мүмкүн.
Пикирлер
Для добавления комментария необходимо быть нашим подписчиком
×