Turmush — «Мекендештер» рубрикасынын кезектеги каарманы — өмүрлүк жарын түрк элинен таап, 7 жылдан бери Аланья шаарында жашап жаткан Эльнура Шаршенова. Ал Turmush басылмасынын кабарчысы менен болгон маегинде чет өлкөдөгү жашоосу тууралуу айтып берди.
Эльнура Шаршенова 1991-жылы Чүй облусунун Ысык-Ата районундагы Чоң-Далы айылында төрөлгөн.
«Кубанычбек Маликов атындагы орто мектепти аяктагам. 4 бир туугандын ортончусумун. Эжем, байкем, мен жана сиңдим бар. Ата-энем азыркы учурда ошол айылда жашашат. Өзүм үй-бүлөм менен Түркияда жашайм. Түрк улутундагы жигитке турмушка чыккам, бир балам бар», - деди ал.
Мекендештин чет өлкөгө болгон сапары 2015-жылы университетти аяктагандан кийин башталган.
«Балалык кыялдарымдын бири — англис тили боюнча котормочу болуу эле. Негизинен тилчилер эл-жер кыдырганды жакшы көрүшөт эмеспи. Ошондуктан мен дагы окууну 2014-жылы бүтүрүп, 2015-жылы Түркия өлкөсүнө кеткем. Максатым эл-жер көрүп жана кесибим боюнча тажырыйба топтоо болгон. Түркия негизи туристтик өлкө болгондуктан дээрлик көп шаарларын кыдырдым. Стамбул, Анталья, Алания, Мармарис, Рива жана башкалар. Андан ары 2016-жылы Стамбул шаарынан Бахрейн өлкөсүнө 2 жылдык келишим менен учуп кеттим. Ал жакта 2018-жылдын декабрь айына чейин эмгектендим», - деди ал.
Эльнура айым жайкы сезондо мейманканада эмгектенет. Ошондой эле кошумча жумушу бар.
«Отурукташып калганыма 7 жыл болуп калды. Өзүмдүн үй-жайым, иштеген ишим бар. Балам 4 жашта, бала бакчага барат. Түркчө, орусча жана кыргызча сүйлөйт. Жолдошум кесиби боюнча агроном жана парниктерди иштетет. Мен болсо жайкы сезондо мейманканада ресепшнде иштейм. Андан сырткары онлайн СММ адисимин. Ата-энем жыл сайын кыш мезгилинде мага келип турушат.
Аланья шаары жайкысын ысык, кышкысын жылуу шаар. Кар таптакыр жаабайт. Ар дайым күн тийип, жылуу болуп турат. Эли кең пейил, боорукер жана жергиликтүү калкы өтө жөнөкөй адамдар. Мамлекет саясатында экономика өтө күчтүү. Мыйзам бузуулар көп катталбайт. Пара берип, ишимди бүтүрүп алайын деген сыяктуу коррупциялык жол жокко эсе. Калкынын жарымы динге өтө маани беришсе, жарымы такыр динден кабары жок. Чет тил билгендер туризм аймактарында көптүк кылат. Негизги тили — түрк тили. Негизи мен жашаган Алания шаары тынч жана меймандос калк. Эч ким бирөөнүн акысын жебейт жана кароосуз көчөдө калган оокатты алышпайт. Медицинасы өтө жогору деңгээлде өнүккөн. Бизге өөн учураган жагы — тамекиге көп басым жасашат», - деди ал.
Ал келечектеги максаттары менен бөлүштү.
«Келечектеги максатым — Түркиядагы кыргыз кыздарынан турган уюм түзүү. Бул уюмда кыска мөөнөтүн ичинде онлайн окутуп, жумуш менен камсыз кылып, декреттеги айымдарга колдоо көрсөтсөм дейм.
Бул жакта эң жөнөкөй кыргызча сүйлөшүп, пикир алмашууну сагынасың. Хоббилерим өтө көп. Ар тараптан билим алганды жакшы көрөм. Бош убакта кардарларыма кирпик өстүрүп, маникюр, кагаздан гүлдөрдү жасайм. Ошондой эле Кыргызстанымды сагынып, бат-баттан барып турам», - деди ал.
Эльнура Шаршенованын айтымында, болочоктогу жолдошу менен 4 жылдай сүйлөшүп жүрүп баш кошушкан. Аны абысындары «Жеки Чандын кызы» деп аташкан.
«Жолдошум менен 2015-жылы таанышкам. Ал кезде мен соода борборунда сатуу бөлүмүндө иштеп жүргөм. Кесиптешимдин досу болчу экен. Досуна жолукканы келгенде таанышып калганбыз. Биз 4 жылдай сүйлөшүп жүрүп, баш коштук. Анын ичи таза, маанайы жарык, ар тараптуу билимдүү адам болгонун жактырдым. Мени 4 жыл күткөнү менен багындырды. Меймандос адам.
Жаңы келин болуп барганда айылдык абысындарым Жеки Чандын айылынан келген келин деп сөз кылышкан. Дагы деле "Жеки Чандын кызы" деп күлө беришет. Бизди кытайга окшоштурушса керек», - деди ал.