Turmush — Чүй районунун Султан айылындагы чарбада арашанчылар арасында легендага айланып калган Майбах аттуу кочкор өлүп калды. Бул тууралуу аймактык кабарчыга арашан породасындагы койлорду баккан фермерлер билдирди.
«Чарбанын ээси бул кочкорду кеминде 50 миң долларга баалап алган. Ал мындан 1 ай мурун белгисиз оору менен ооруп, өлүп калды. Ошол күнү дароо экспертизага берилди. Ички органдарында эч кандай дарт же курт жок экен. Бирок өпкөсү карарып кетиптир. Бул башка кочкор катуу сокку менен сүзгөндөн же катуу жыгылгандан болот. Майбахтын көп эле чарбаларда тукумдары калды. Бирок түз өзүнөн туула турчу тукуму токтоду десек болот», - деп айтылат маалыматта.
- Арашан породасы 1970-2021-жылдары Кыргызстанда чыгарылган. Фермерлер 1977-жылы Тажикстандан гиссар породасындагы кочкорду алып келип, жергиликтүү кылчык жүндүү кой менен аргындаштырышкан. Аргындаштырылгандан кийинки туулган экинчи муундагы козуларын көбөйтүшкөн. Арашан породасындагы койлор бийик тоолордо жана талааларда багууга ылайыктуу келип, козулары тез чоңоёт. Көлөмү чоң, куйруктуу келип, 7-8 айлык козуларынын салмагы 48-61 кг, бир жаштагысы 60-78 кг, ал эми чоң койлорунун салмагы 109-177 килограммга чейин жетет. Ошондой эле сөөгү жеңил жана катуу келет. Кочкорлорунун мүйүзү болбойт. Козуларынын болжолдуу баалары 1000 доллар, ал эми койлору 5000 доллардан жогору.